TOKYO (TOP) – Viajen Pessoa Eminente g7+, Kay Rala Xanana Gusmão la’os ba nasaun Nippon (Japaun) la’os atu simu de’it titulu akademiku sira hanesan doutór onorariu sira, maibé konsege mós negósia Universidade Waseda iha Japaun hodi simu estudante sira husi nasaun membru g7+ iha mundu hodi ba hasai kursu akademiku iha área oioin iha universidade ne’e.
Universidade Waseda, abreviada ba Sōdai, nu’udar universidade privadu ba peskiza ne’ebé lokalizadu iha Shinjuku, Tokyo. Harii iha tinan 1882 ho naran Tōkyō Senmon Gakkō husi Ōkuma Shigenobu, no foin muda nia naran ba Universidade Waseda iha tinan 1902.
Universidade Waseda konsidera nu’udar universidade ida ne’ebé iha prestiju no reputasaun a’as, no tama ba klasifikasaun universidade di’ak ida hotu iha Japaun.
Pedidu negosiasaun hodi simu estudante sira husi nasaun membru g7+ akontese durante enkontru armonia entre Kay Rala Xanana Gusmão ho Vise Prezidente University Waseda, Masahiko Gemma ho Diretor Administrasaun ba Assuntu Divizaun Internasional, Hidetaka Yamada, no akompaña mós husi Embaixador Timor-Leste ba Japaun, Ilidio Ximenes da Costa no Diretor Operasaun g7+, Felix Piedade.
Vice Prezidente Waseda University, Masahiko Gemma katak, sira nia parte sente onradu tebes atu simu estudante sira husi nasaun membru g7+ nu’udar pasu pozitivu hodi promove liutan kualidade edukasaun no fahe matenek husi dosente universidade ne’e nian ba estudante sira husi nasaun oioin iha planeta mundu ne’e.
“Waseda University prontu atu simu estudante nasaun membru g7+ nu’udar pasu pozitivu ida atu promove kualidade edukasaun hosi universidade ne’e nian ba ema hotu- hotu,” informa Masahiko Gemma iha universidade Waseda Japaun.
Xanana mós hato’o agradese hodi esklarese mós defikulidade ne’ebé nasaun membru g7+ sira hasoru iha área edukasaun presiza hetan apoia hosi univeridade sira iha Japaun no nasaun seluk tan ne’ebé iha rekursu no biblioteka komplete hodi fasilita rekursu ida ho kualidade.
Xanana hatutan, nia parte sei transmite mensajen osan mean no pozitivu hosi Universidade Weseda nian ba nasaun membru g7+ iha enkontru boot ne’ebé sei hala’o iha Portugál.
“Lori nasaun membru g7+ sira hotu, ha’u hato’o apresiasaun boot, ba imi nia domin no imi nia laran di’ak sira atu simu ha’u nia pedidu hodi simu estudante nasaun membru g7+ mai hala’o sira nia estudu iha ne’e. Ida ne’e hanesan informasaun di’ak ida ha’u sei trasmite ba ekontru pais g7+ iha Portugál,” dehan Xanana.
Eis Komandante Em Xefe das FALINTIL, Xanana dehan molok estabese kooperasaun ne’e, kada nasaun membru g7+ sei difine sira nia kritériu atu halo selesaun ba estudante nasaun membru sira ne’ebé iha vontade no matenek bele aplay vaga estudu iha universidade Waseda Japaun.
Molok estabelese kooperasaun ne’e, ekipa tekniku nasaun membru g7+ sira hala’o vizita ba universidade Japaun hodi deskute formatu no tekniku kooperasaun servisu hodi prepara kreitériu sira molok estabelese Memorandum of Undertending (MoU) iha tinan oin.
Entretantu, durante vizita ba Japaun, Xanana hato’o mós palestra públiku ba estudante sira husi Universidade Waseda ho tema “Papale Nasaun g7+ Hodi Harii Pás” ne’ebé hetan partisipasaun masimu hosi estudante sira ne’ebé halo estudu Kooperaasaun Internasionál Harii Pás (International Cooperation and Peacebulding).
