LIFAU iha Oe-Kusi Ambeno ne’ebé iha tinan 1515 sai nu’udar portaun no sentru primeira evanjelizasaun Cristianizmu iha illa Timor (inklui Nusa Tenggara Timur) durante tinan 100-resin, oras ne’e iha ameasadu nia laran atu nakfilak ba sentru hedonizmu, sentru atividade prostituisaun, sentru habosok ema liu husi kontaktu telemovél (Scam Call Center), sentru trafiku humanu no ikus mai sei sai sentru ba grupu kriminozu mundiál ida iha rejiaun Sudeste Aziatiku.
Lifau hanesan suku ida ne'ebé lokaliza iha postu administrativu Pante Macassar, iha Rejiaun Administrativa Espesial Oe-Kusi Ambeno (RAEOA), Timór Lorosa'e. Área Lifau rasik la’os suku tomak mak kilómetru kuadradu 19,14, no ninia populasaun hamutuk abitante 2,505, tuir sensu 2015 nian. Monumentu Lifau marka akontesimentu prinsipál iha istória Timor-Leste no Igreja Katólika iha Illa Timor.
Iha ne’e, espesifikamente iha Tasi-ibun Lifau, mak portugés sira tun iha tinan 1515 no hahú kolonizasaun ida ne’ebé dura liu tinan 450, ikusmai harii kapitál portugés. Husi Lifau mak misionáriu dahuluk sira hahú habelar fiar Katólika iha Illa Timor tomak.
Ohin, se ita-boot vizita Lifau, ita-boot sei haree evidénsia istóriku ho Monumentu Lifau no réplika ró vela Portugés nian ne'ebé to'o iha Lifau, Oe-Kusi Ambeno.
Lifau iha tempu uluk
Oe-Kusi Ambeno nu’udar pontu dahuluk iha illa Timór ne’ebé portugés sira hela, tanba ne’e mak baibain ema konsidera nu’udar fatin moris Timor-Leste nian. Bele dehan, laiha Lifau, la iha Timor-Leste. Laiha Lifau, laiha relijiaun Katolika iha Timor-Leste.
Iha tinan 1556, grupu Frade Dominikanu sira harii povoasaun dahuluk iha Lifau, kilómetru sanulu-resin-rua ba oeste Pante Macassar nian. Iha tinan 1702, Lifau sai hanesan kapitál kolónia nian bainhira simu governante dahuluk ne'ebé haruka hosi Lisboa, estatutu ida ne'ebé nia mantén to'o tinan 1767, bainhira portugés sira desidi muda kapitál ba Díli, tanba inkursaun beibeik hosi forsa olandeza sira.
Foin iha tinan 1859, ho Tratadu Lisboa, mak Portugál no Olanda fahe illa entre sira: Timór Osidentál ba olandés sira, ho nia sede iha Kupang, no Timór Lorosa’e ba portugés sira, ho nia sede iha Dili, hodi rekoñese Oe-Kusi Ambeno nu’udar esklave portugés iha territóriu olandés nia kabun-laran.
Invazaun Indonézia ba fatin ne’ebé iha tempu ne’ebá hanaran Timor Portugés akontese iha Oe-Kusi Ambeno semana ida antes molok da’et ba munisipiu 12 iha Timor-Leste; iha loron 29 fulan-novembru tinan 1975, Pante Macassar hetan okupasaun hosi koluna dalimak ezérsitu indonéziu nian. Maibé, maski iha okupasaun Indonézia nia okos, Oe-Kusi Ambeno kontinua administra nu’udar parte provínsia Timor-Timur (naran ba Timór-Leste iha lian Indonézia), hanesan uluk iha Portugés nia okos. Tanba ne’e, bainhira Timor-Leste restaura ninia independénsia iha loron 20 Maio 2002, Oe-Kusi Ambeno sai nu’udar parte integrante hosi repúblika joven ne’e.
Istóriku Inglés Herbert Butterfield dala ida hatete, "Liu fali buat hotu, ida-ne'e mak kbiit hosi memória istóriku ne'ebé mak liga ema Israel sira hamutuk nu'udar povu ida."
Deklarasaun ida-ne'e implika katak, istória la'ós de'it kestaun ida kona-ba akontesimentu sira iha pasadu. No mós la'ós memória ida ne'ebé dalaruma atu haree de'it. Maibé ida-ne'e mak parte ida ne'ebé labele haketak hosi moris ne'e rasik.
Ida-ne'e liga hamutuk fiu tolu tempu nian: pasadu, prezente, no futuru. Lasu ida-ne'e sai metin liután bainhira Maromak, ne'ebé sira fiar, iha papél signifikativu hodi determina diresaun sira nia moris nian.
Lifau tempu ohin loron
Serbisu Nasionál Intelejénsia (SNI) hamutuk ho Polísia Siéntifika Investigasaun Kriminál (PSIK) iha Segunda, 25 Agostu 2025, mais-menus oras tuku 21:00 kalan, hala’o vizita supreza ida, hodi buska no halo apreensaun ba atividade ilegál hanesan Bosok Online (Online Scamming), jogu online, ne’ebé deskonfia autoriza husi Prezidente Autoridade Rejiaun Administrativa Espesiál Oé-kusi Ambeno (RAEOA), Rogério Tiago de Fátima Lobato.
Ekipa SNI ho PSIK, ne’e tama derrpenti de’it, no konsege sita telefoni tantu jestór no traballadór sira, inklui sita mós mós sistema aplikativu Online Scamming nian. No, ekipa konjunta kontinua identifika tan pesoál ka traballadór sira tantu timoroan no estranjeiru iha kuartu idak-idak, maibé faktu hatudu maioria nakonu ho feto mai husi Indonésia, Xina, Malasia no Singapura.
“Imi mai iha ne’e ho objetivu la klaru, mai atu estraga de’it rai Santo Lifau,” membru ekipa konjuntu ida hateten ba feto ilegal sira ne’ebé durante fulan barak ona sulan metin iha hotel Oe-Upu nia laran.
Durante ne’e mosu reasaun kontra oioin husi povo Ambeno iha plata forma media sosial (Facebook) katak, hotél Bintang Lima Oe-Upu Ambeno ne'ebé antes ne'e sai fatin ba autoridade sira hodi halo serimonia ofisial sira estadu, Governu nian hanesan formasaun, treinamentu, no sosializasaun, inklui aktividade seluk husi Governu, no seluk tan. Oras ne'e hotel Bintang Lima deskonfia nakfilak ba fatin operasaun aktividade sentru prostituisaun (Sex Hub, jogu Online no atividade kriminal sira seluk.
Oras serbisu, tama 09 dader-sai tuku 09 kalan, Tama tuku 11 dader sai tuku 11 kalan. Ida ne’e hatudu, kompañia internasional ne'e livre hodi hala'o nia aktividade tuir nia hakarak, hakat-liu oras serbisu ne'ebé regula husi governu Timor-Leste.
Nune'e mós nia regra oin-seluk, tama labele lori telefone, labele foti foto no halo video. PA-RAEOA ezonerado, señor Rogerio Tiago Lobato iha ninia statementu politika sira dehan sei loke kampu de traballu ba Atoni-oan rihuhun ba rihun durante ne'e ninia rezultadu maka ne'e. Loloos Governu Sentral presija halo investigasaun ba kompaña internasional "seagull resort" ne'ebé daudaun ne'e deskonfia utiliza hotél Oe-Upu ne’e.
Ses husi ne’e, maske seidauk hetan lisensa husi parte governu sentrál liu-liu husi Inspetoria dos Jogos e Lotaria, maibé Hotel Oe-Upu durante ne’e deskonfia hala’o hela bosok online (Online Scamming) no sai nu’udar armazen di’ak ida hodi hatama ka importa traballador feto-mane husi rai-liur hodi hala’o serbisu bosok-ten inklui atividade prostituisaun nian.
Povo Ambeno presija duni dezenvolvimentu iha área oioin, maibé povo Ambeno diskorda total ho lokalidade ka fatin ba atividade jogo online no atividade hedonizmu sira seluk. Fatin ba atividade hirak ne’e tuir loloos labele besik portaun boot Lifau, tenke do’ok husi sentru kapital Lifau nian.
Fatin ne’ebé apropriado no pertinente mak bele lokaliza iha Suku Suni-Ufe nia rohan iha área Panaf Ha’u-Fo’o ne’ebé besik tasi ibun no iha paisazen furak no kapas, no fatin ne’e mós oras ne’e mamuk hela no do’ok husi komunidade sira nia hela fatin.
Autoridade tuir mai se hakarak kontinua modelo investimento hanesan ne’e karik ninia fatin tenke ketak, no do’ok husi komunidade nia hela fatin hodi bele evita ninia impkatu negativu sira husi modelu investimento hanesan ne’e.
Tenke hare fatin mamuk ida ne’ebé do’ok husi komunidade nia fatin mak bele koloka ba. Se besik loos ho komunidade sira mak ninia impaktu negativu ne’e sei estraga hotu kedas joven Oe-Kusi Ambeno nian iha tempu badak nia laran.
Ita hotu nu’udar povo Ambeno tenke hato’o apresiasaun boot ba ekipa konjuntu SNI no PSIK ne’ebé iha loron Segunda liu-ba ho Maromak nia tulun, no rai-Ambeno nia tulun konsege desmantela ona rede Scam Call Center no jogo online ne’e iha Hotel Oe-Upu. Dala ida tanba agradese uain no obrigado barak ba ekipa konjuntu sira nia serbisu ne’e.
Maske, ekipa konjuntu SNI no PSIK konsege desmantela ona Sex Hub no Online Scam Call Center iha Hotel Oe-Upu ne’ebé besik loos primeira capital Timor-Leste iha tinan 1702 to’o 1769, no nu’udar mós portaun boot ba primeira evanjelizasaun igreja katolika iha Timor-Leste tomak, maibé mai ita kontinua tau matan lisuk ba Lifau hodi nafatin sai fatin SAGRADO ba ita hotu iha Timor-Leste tomak.
