DILI (TOP) – Ro Berlin Ramelau tuir loloos tenke sai ona husi portu Dili ba portu Iwao Kitahara iha Oe-Kusi Ambeno iha oras tuku 4 lorokraik, maibé la konsege sai tuir oras ne’ebé determinadu, tanba ro ne’e nia odamatan aat ona hodi taka mós la di’ak.
“Ami hamlaha loos ona, no agora tekniku sira ko’a hela odamatan ne’e atu bele loke, maibé seidauk hotu,” katak pasajeiru ida via kontaktu telemovel ba The Oe-Kusi Post (TOP), Kinta, 13 Janeiru 2022.
Pasajeiru ne’e hatutan, ro foun ne’e mós laiha kantina hodi fasilita pasajeiru sira atu bele sosa hahan ruma.
“Ro foun, maibé fatin toba maka araska, tanba laiha. Air Conditioner mós laiha,” esplika pasajeiru ne’e.
Hafoin hadia liu tiha oras balun maka foin di'ak, no fó tempu minutu 30 laran ba pasajeiru sira atu sai ba sosa hahan molok sai ba Oe-Kusi Ambeno. Ro ne'e foin maka atu sai husi portu Dili ba Oe-Kusi Ambeno iha Kinta, 13 Janeiru 2022 oras tuku 8 kalan.