DILI (TOP) – Asesor internasionál ida husi Portugál iha Gabinete Komandu Jerál Polisia Nasionál Timor-Leste (PNTL) deskonfia pozitivu Covid-19 hafoin halo teste swab foin lalais.
Tuir informasaun ne’ebe The Oe-Kusi Post (TOP) asesu katak, asesór husi membru Guarda Nasionál Repubicana (GNR) Portugál ne’e sofre pozitivu Covid-19, hafoin ekipa Komandu Jerál PNTL realiza teste swab masal ba ofisiál superiór gabinente PNTL ne’ebé hala’o iha loron 30 Abril 2021.
“Dadaun ne’e, Komandu PNTL koordena ho Ekipa Ministériu Saúde fó hela asitensia saúde ba membru asesor ne’e hodi kumpri iha kuaretena para rekopera nia saúde,” esplika fonte ida ba TOP.
Atu evita númeru COVID-19 labele alastra iha Komandu Jerál PNTL, Komisáriu Polisia, Faustino da Costa orienta halo teste jerál ba membru PNTL unidade hotu- hotu obrigasaun tuir teste swab masal.
Portavós Komandu Jerál PNTL, Superintendente Xefe, Arnaldo de Araújo dehan, membru PNTL nu’udar ekipa forsa liña fronte ne’ebé halo servisu implementa lei no ajuda Ministériu Saúde sosializa regra prevensaun Covid-19 hotu-hotu tenki tuir teste swab nu’udar ezemplu di’ak ba abitante Timor-Leste hodi luta prevene aan hosi ameasa Covid-19.
“Atu membru PNTL, komunidade ka membru F-FDTL, ita hotu-hotu iha obrigasaun tuir teste swab, tanba PNTL sira maka liha liña fronte lor-loron hasoru komunidade. Ita hadomi ita nia aan, ita hadomi ita nia familia hodi tuir teste para prevene aan hosi moras,” dehan Arnaldo ba jornalista iha Komandu Jerál PNTL, Caicoli, Dili.
Hahú kedas iha loron 30 Abril 2021, Komandante Jerál Jerál PNTL, Komisáriu Polisia, Faustino da Costa, Segundu Komandante, Komisáriu Polisia, Mateus de Jesus no ofisiál Superiór PNTL halo ona teste swab ba dala rua no, Kinta 06 Maiu 2021, ekipa Saúde PNTL no ekipa Pilar III Ministériu Saúde kontinua halo teste swab ba membru Unidade Espesiál Polisia (UEP).
Membru EUP sira ne’ebé partisipa iha teste swab kompostu husi komandante no membru hodi halo prevensaun ba sira nia saúde.
Komandante Arnaldo katak ba membru sira ne’ebé swab maka rezultadu pozitivu Covid-19, Komandu PNTL sei fasilita hodi submete ba kuarentena ne’ebé governu prepara ona.
“Se ita pozitivu Covid-19, ita tenki ba hela iha fatin kuaretena ou fatin konfinamentu mesak ne’ebé tenki priense rekezitu husi Ministériu Saúde,” nia esplika.
Amostra teste swab membru PNTL ne’ebé ekipa saúde ohin rekolla ona ohin, sei lori hikas ba Sentru Laboratóriu Nasionál hodi teste no fó sai rezultadu ba Komandu PNTL. No rezultadu hatudu iha asesor internasional ida maka konfirmadu pozitivu Covid-19, maibé Portavoz PNTL, Superintendente Xefe Arnaldo de Araújo rejeita atu esplika kona-ba kazu pozitivu ne’e.
“Ida ne’e ha’u labele hateten iha ne’e, ida ne’e ema ida nia privasidade, no ida ne’e komandu rasik ne’ebé serbisu ho nia maka bele hatene, maibé jeralmente ha’u bele dehan katak, sei fó imi hatene kona-ba saida de’it maka akontese iha komandu jeral ne’e,” Komandante Arnaldo hateten liu husi konferénsia ba imprensa iha kuartel jeral PNTL, Kaikoli, Dili Kinta 06 Maiu 2021.
