DILI (TOP) – Dadus husi Sentru Integradu ba Jestaun Krize (SIJK) hatudu durante loron 28 Maiu to’o loron 8 Juñu foin lalais iha ema hamutuk nain 27 mak tama illegalmente mai Timor-Leste.
Dotora Odete da Silva Viegas husi SIJK katak, to'o ohin loron, ema kontinua tama ilegalmente mai Timor-Leste liuhosi fronteira terrestre ho Indonézia.
“Hahú hosi loron 28 fulan-maiu to'o loron 8 fulan-juñu tinan 2020, ema hamutuk 27 tama ilegalmente mai Timor-Leste liuhosi fronteira terrestre,” hateten dotora Odete liu husi konferénsia ba imprensa iha sala situasaun SIJK, Segunda 08 Juñu 2020.
Odete hatutan, husi ema nain 27 ne'e, ema hamutuk nain sanulu resin rua (12) maka tama ilegál liuhosi fronteira Batugadé, nain sanulu (10) iha ona kuarentena no nain rua (2) deporta tanba la’os sidadaun Timor. Iha fronteira Salele, Kovalima iha sidadaun nain 6 mak hakat liu rai-ketan, nain 3 iha ona fatin kuaretena no nain 3 seluk deporta tanba la’os Timoroan.
Ema ne'ebé tama klandestinamente iha fronteira RAEOA hamutuk nain 9, nain 2 tama husi Oe-Silo, nain 4 tama husi Pasabe no nain 3 tama husi Oel-Ulan. Husi sidadaun nain 9 ne'e, nain 8 iha ona kuarentena no nain ida deporta hikas ba Indonézia.
Odete afirma, maske serbisu seguransa iha fronteira terrestre asegura ona husi UPF no F-FDTL, maibé presija buka tan alternativa seluk hodi reforsa serbisu seguransa iha fronteira terrestre ho Indonézia tanba sei iha ema ne'ebé maka kontinua tama ilegalmente mai Timor-Leste no iha posibilidade risku ba transmisaun Covid-19 iha komunidade nia le’et. Odete Viegas hato'o afirmasaun ne'e hafoin hala'o vizita ba iha fronteira Mota-Masin, iha munisípiu Covalima hodi hare fatin ne'ebé dala barak autoridade seguransa detein ema sira ne'ebé tama ilegalmente mai territóriu Timor-Leste.
Nia dehan, Ministériu Saúde hamutuk ho parseiru sira iha planu atu utiliza ekipamentu eletróniku hodi ajuda servisu autoridade seguransa iha fronteira atu nune'e bele detekta ema sira ne'ebé tama klandestinamente.
Diretora-Jerál ba Prestasaun Servisu Ministériu Saúde konsidera vizita ida ne'e importante tebes hodi observa diretamente dalan klandestinu sira iha munisípiu Covalima no iha parte seluk atu identifika mós problema ne'ebé autoridade seguransa sira hasoru iha terrenu, atu nune'e bele buka solusaun ba difikuldade hirak ne'e.
Vizita ba iha munisípiu sira ne'ebé lokaliza iha fronteira entre Timor-Leste ho Indonézia nu'udar prioridade ida husi estadu emerjénsia faze datoluk nian iha prevensaun no kombate Covid-19 iha rai laran.
Timor-Leste manteinn kazu konfirmadu 24 no provável 4 ho kazu foun ikus rejista iha loron 24 fulan-abril.
Oras ne'e dadaun, ema iha kuarentena obrigatóriu hamutuk 58 no auto-kuarentena hamutuk 56. Ema ne'ebé kompleta ona loron 14 iha kuarentena kumulativamente hamutuk 2397.
