Dili (TOP)— Vise Koordenadora Forsa Tarefa ba Prevensaun no Mitigasaun Surtu Covid-19, Odete da Silva Viegas afirma, ba sidadaun sira ne’ebé simu ona vasina dala rua bele halo movimentu livre iha territorio nasionál, maibé tenki hetan karta autorizasaun hosi Sentru Integradu Jestaun Kríze (SIJK).
“Simu ona vasina dala rua ita atu mobiliza ba muisípiu la presiza ona swab test, maibé ita atu ba munisípiu tenki husu nafatin karta autorizasaun,” Odete ba jornalista iha CCD-Dili, Kinta 10 Juñu 2021.
Nia hatutan, ba ema hirak ne’ebé simu ona vasina kompleta labele halo kedas movimentu ba munisípiu, presiza hein to’o semana rua mak foin bele ba.
“Tanba aimoruk ne’e sei fó reasaun di’ak liu ba ita nia isin, hodi bele hasa’e ita nia sistema imunidade di’ak liu entre loron primeiru vasina to’o semana rua. Tanba ida ne’e maka ita nia imunidade sei kompleta depois de semana rua ita simu vasina,” nia reforsa.
Alende ne’e nia informa, ba inan isin rua seidauk iha estudu ida espesiál kona-ba sira, tanba ne’e sira la presiza vasina maibé tenki kumpre nafatin protokolu saúde ne’ebé iha hanesan uza máskara, fase liman beibeik no distánsiamentu fíziku hodi prevenee aan labele kona covid-19.
Entretantu, antes ne’e Primeiru-Ministru, Taur Matan Ruak katak, sidadaun ne’ebé maka simu ona vasina dala rua sei la’o livre ona iha teritóriu nasionál.
