Hetan dezastre iha Fatuhada, maibé lori ba HNGV nakfilak kedas ba positivu Covid-19

DILI (TOP) – Tuir kronolojia akontesimentu katak, matebian Fernando do Rego hetan asidente tráfiku iha estrada boot iha quartel jeral FALINTIL-Forsa Defeza Timor-Leste (F-FDTL) iha Fatuhada iha loron Tersa 27 Abril 2021, maibé depois familia sira lori nia atu ba konsulta iha Hospital Nasionál Guido Valadares (HNGV) hetan kedas moras positivu Covid-19 hafoin médiku sira halo teste swab.

Matebian ne’e lori motor mega-pro halai ho velosidade a’as, no konsege soke tiha kareta ida iha Fatuhada. Iha asidente ne’e rezulta matebian hetan kanek todan iha parte liman ho ain. Durante loron balun nia laran, kondisaun saúde matebian nian la hatudu progresu di’ak, nune’e familia sira desidi lori ba HNGV hodi hetan tratamentu intensivu. Familia sira lori matebian ba HNGV iha loron 29 Abril 2021 oras lorokraik.

Regra ka protokolu Covid-19 ne’ebé estabelese iha HNGV katak pasiente hotu ne’ebé atu ba konsulta iha HNGV ne’e obrigatoriu tenke halo teste swab maka foin bele halo tratamentu. Rezultadu husi teste swab maka hatudu positivu, governu desidi tenke vakua kedas ba fatin izolamentu iha Sentru Saúde Vera Cruz, Dili.

Tanba rezultadu teste swab hatudu positivu Covid-19, nune’e ekipa ambulansia Ministériu Saúde nian transporta matebian ne’e ba Vera Cruz. Esperansa atu hetan moris naruk iha Vera Cruz ne’e laiha rezultadu di’ak ba ema hotu, liliu ba familia sira. Fernando do Rego ikus mai iis kotu iha Vera Cruz iha loron Domingu, 2 Maiu 2021.

Lala’ok teste swab ba matebian Fernando kuaje hanesan mós ho matebian Armindo Borges ne’ebé tuir familia sira katak nia sofre moras stroke kleur ona, maibé bainhira lori ba atu halo tratamentu iha HNGV hetan kedas positivu Covid-19. Situasaun ne’e mós akontese ba matebian Olga Mendonça ne’ebé iha uma sofre moras tensaun, maibé ba fali HNGV dehan positivu Covid-19.

Matebian Fernando toba kalan tolu iha fatin izolamentu Vera Cruz.

Matebian ho tinan 27 ne’e husi suku Makadiki, Postu Administrativu Watulari, Munisipiu Vikéké, no durante ne’e hela iha aldeia 25 Abril, Kintal Boot, Dili. Nia husik hela nia kaben, ho oan na'in 4, feto na'in tolu no mane ida.

Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo katak, kazu sirurjia 1 tanba asidente tránzitu, no iha ‘’Severe Head Injury’’ & detetadu pozitivu SARS-Cov-2.

“Ohin 2 maiu 2021 tuku 07h29 dadeer hakotu-iis. Ninia istória klinika hanesan tuirmai: Mane, idade tinan 28, iha 27 abril 2021 tama iha Departamentu Emerjénsia HNGV ho diagnóstiku ‘’Severe Head Injury’’ hafoin asidente tránzitu. Iha loron ne’e kedas família husu lori fila ba uma,” hateten Rui liu husi komunikadu imprensa ne’ebé TOP asesu iha pájina ofisial Pálacio das Cinzas, Domingu 02 Maiu 2021.

Nia hatutan, iha loron 29 Abril 2021 tama fali iha Departamentu Emerjénsia HNGV ho nível konsiénsia reduzida (Glasgow Coma Scale: 6) Exame diagnóstiku ho CT scan hatudu ‘’Difuse Axional Injury & Edema Cerebri’’.

“Ida-ne’e rezultadu husi trauma iha ulun wainhira hetan asidente loron 2 liubá. Teste PCR hatudu rezultadu pozitivu ho CT: N2 gene 20.6; E gene 20.4,” Rui esplika.

Nia dehan, husi 29 Abril kalan to’o dadesan hetan tratamentu tuir prosedimentu ba ‘’Severe Head Injury’’ iha fatin izolamentu Vera Cruz atu prevene labele da’et-tutan virus SARS-CoV-2 ba pasiente sira seluk iha HNGV.

“Hafoin iis-kotu, teste PCR post-mortem nafatin hatudu SARS-COV-2 pozitivu ho CT N2 gene 24.1, E gene 22.4. Ekipa konjunta saúde sei hein dezisaun husi família atu haloot mate-isin iha fatin preferénsia familia nian tuir regras ne’ebé determina ona”.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE