DILI (TOP) – Polisia Nasionál Timor-Leste liu husi Serbisu Investigasaun Kriminal (SIK) notifika ona eis petisionariu Amaro da Costa alias Susar hodi ba presta deklarasaun iha loron Kinta 01 Abril oras tuku 9 dadersan.
Karta notifikasaun husi PNSIK ba Susar ne’ebé The Oe-Kusi Post (TOP) asesu ho Númeru Unidade Crime (NUC): /21.PNSIK. Karta ne’e hakerek Mandado Notifikasaun ho baze legal Lei Kódigu Prosesu Penal (KPP) artigu 91 to’o 94, ho Dekretu Lei Número 09/2009. Lei Organika PNTL.
Mandado notifikasaun ne’e husu ba Susar atu marka prezensa iha Quatel Jeral PNTL, Serbisu Investigasaun Kriminal Nasionál iha loron Kinta 01 Abril 2021, oras tuku 9 dadersan hodi submete ba prosesu identifikasaun artigu 52 husi Kodigu Prosesu Penal Timor-Leste nian.
Antes ne’e Susar hatais faru mutin ho imajen Kay Rala Xanana Gusmão taka boina mean iha oin partisipa fó solidariedade ba Kay Rala Xanana Gusmão bainhira ba kumpri notifikasaun Ministériu Públiku nu’udar sasin ba keixa ne’ebé aprezenta husi Sekretariu Jeral partidu FRETILIN Mari Alkatiri nian iha loron Segunda 29 Marsu 2021.
Susar oras ne’e nu’udar lider Klibur Tane A’as Obra Maun Boot Kay Rala Xanana Gusmão nian, no TOP esforsu kontaktu ona nia, maibé seidauk hetan komentariu ruma husi nia.
