Tauk vota kontra extensaun EE, MS liberta ona Naimori

DILI (TOP) – Ema hamutuk nain 456 maka oras ne’e sei kontinua kumpri kuarentena orbigatoriu iha fasilidade governu nian iha rai-laran, maibé Ministériu Saúde no Sentru Jestaun Krize liberta ona Konseleiru Masimu partidu Kmanek Haburas Unidade Timor Oan (KHUNTO) José Naimori Bucar husi Hotel Novo Horizonte ba nia uma iha Manleu, Dili, tanba tauk deputadu sira husi partidu KHUNTO vota kontra extensaun Estadu Emerjensia, katak fonte konfirmadu ida.

Tuir informasaun ne’ebé The Oe-Kusi Post (TOP) asesu, Naimori sai ona husi Hotel Novo Horizonte iha loron Kuarta 31 Marsu 2021 oras meudia fila ba nia uma iha Manleuana, Dili.

Ekipa ambulansia Ministériu Saúde nian ba foti Naimori iha Manleu, Dili iha loron Domingu 28 Marsu 2021 hafoin rezultadu teste swab katak nia “positivu kona moras Covid-19”, maibé bainhira to’o ne’eba Naimori la koopera hodi lakohi sa’e ba kareta ambulansia ne’ebé governu prepara ona. Nia lori rasik nia kareta husi nia uma Manleu ba fatin kuarentena iha Hotel Novo Horizonte, Meti-Aut, Dili.

“Nia sai tiha ona horseik meudia. Moras Covid-19 ne’e puramente politika ona, tanba KHUNTO halo presaun maka’as ba Ministériu Saúde katak se la liberta Naimori husi kuarentena, KHUNTO sei vota kontra total extensaun Estadu Emerjensia ne’e,” hateten fontes ida ba TOP ohin.

Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, CIGC-SS, Rui Maria de Araújo hatan ba pergunta husi jornalista GMN katak, Ministériu Saúde maka iha kompetensia hodi foti desijaun ba kestaun ne’e.

“Kona-ba naran ida ne’ebé ita boot temi hanesan baibain Sentru Integradu Jestaun Krize la jere spesifikamente naran ida ka rua. Iha duni informasaun katak tuir Dekretu Governu ne’ebé governu aprova tiha ona iha desijaun atu halo auto-izolamentu, maibé ida ne’e kompetensia autoridade relevante nian. Tuir Dekretu Governu, Ministériu Saúde maka iha kompetensia atu foti desijaun sira ne’e,” Rui Araújo hatan pergunta husi GMN via ZOOM iha loron Kuarta 31 Marsu 2021.

Iha parte seluk, tuir seguransa Hotel Novo Horizonte nian ida katak, Naimori sai duni ona husi fatin ne’e iha loron Kuarta meudia.

Entretantu, reuniaun Konsellu Ministru (KM) estra-órdinaria aprova ona Projetu Dekretu Governu ba alterasaun dahuluk Dekretu Governu númeru 6/2021 loron 02 Marsu.

Medida ezekusaun deklarasaun Estadu Emerjénsia hosi Dekretu Prezidente Repúblika númeru 15/2021, loron 01 Marsu, tama iha vigór hahú hosi tuku 23:59 loron 02 abríl 2021.

Aprovasaun ne’e hafoin halo análize ba  aprezentasaun Koordenadór Sala Situasaun Sentru Integradu Jestaun Krize (CIGC) kona-ba pontu situasaun epidemiolójika nasionál.

“Ho alterasaun ne’e, izolamentu terapéutiku (kuarentena) bele hala’o iha uma, tuir despaisu fundamentadu hosi Minista Saúde (MS),” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu liuhosi video konferénsia, iha loron Segunda 29 Marsu 2021.

Governante mai husi Partidu Libertasaun Popular (PLP) ne’e, katak iha posibilidade hala’o kumpre kuarantena iha uma, maibé despeza relasiona ho estabelesimentu saúde no rezidénsia iha sentru izolamentu privadu sira hosi individu ida-idak.

Projetu Dekretu Governu ne’e define mós katak sidadaun hotu ne’ebé hela iha Timor-Leste iha obrigasaun atu evita formasaun halibur-malu iha dalan públiku.

KLARIFIKASAUN:

Redasaun TOP hafoin verifika foto ne'ebé sai viral iha plata forma media sosial durante loron hirak nia laran, no foti uja iha notisia ne'e hamosu konfujaun. Tanba ne'e redasaun TOP desidi hasai tiha fali foto ne'e, no tau fali ho foto seluk. Ba fallansu ne'e redasaun TOP troka ona foto, no husu deskulpa ba públiku. 

 

The Oekusi Post
Author: The Oekusi PostWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál. Rua. Numbei, Oe-Kusi Ambeno Mobile: +670 7723 4114 Email: info (at) OeKusiPost.com

PUBLISIDADE