DILI (TOP) — Hahalok la’o sai (walk out) husi salaun plenária Parlamentu Nasionál (PN) la’os foin mak akontese ba partidu politika sira iha Setembru 2020, maibé akontese nanis ona hahu kedas husi partidu FRETILIN bainhira sei nu’udar partidu opozisaun.
Hafoin governu FRETILIN ne’ebé lidera husi Primeiru Ministru, Mari bin Amude Alkatiri monu husi nia tronu poder iha tinan 2006, hahu husi tempu ne’eba kedas deputadu FRETILIN sira iha PN sempre uja tátika politika walk out, no vota kontra inklui vota kontra fronteira maritima nu’udar soberanu RDTL nian iha tinan 2019.
Tátika ida ne’e ohin loron kona, no nada’et ona ba deputadu sira husi partidu Congresso Nacional de Reconstrução de Timor, CNRT ne’ebé desidi walk out husi salaun plenária PN molok Prezidente Repúblika (PR), Francisco Guterres Lú-Olo hato’o nia diskursu ba loke sesaun datoluk ba lejistlativa dalimak nian.
“Ha’u hanoin ita bo’ot sira, hatene nanis ona kona-ba pozisaun bankada CNRT nian liga ba legalidade meza Parlamentu Nasionál buat hirak ne’e, tanba ne’e ohin bankada CNRT tama ba sesaun plenaria Parlamentu Nasionál. Tanba ami hakarak aproveita oportunidade atu hato’o kedas ami nia pozisaun ba Prezidente Repúblika atu rona direita saida maka preokusaun bankada CNRT nian,” Vise xefe bankada CNRT, deputadu Patrocínio dos Reis Fernandes ba jornalista sira iha salaun bankada CNRT Parlamentu Nasionál, Dili, Tersa 15 Setembru 2020.
Deputadu CNRT husi munisipiu Manufahi ne’e lamenta, nasaun demokrátiku presiza harii Estadu ida ne’ebé tuir lei.
Ita labele harii Estadu ida ne’ebé maka povu sosa ho nia-ruin no ran ho interese ema ida-idak nia gostu. Hetan tiha poder, ita sama hotu lei ne’ebé hanesan mata dalan ba nasaun ida ne’e, tanba n’e maka ami hanoin katak ami la presiza tur iha laran para atu legaliza fali sesaun ida ne’ebé maka laiha ninia valor legalidade.
Entretantu, Prezidente Repúblika, Francisco Guterres Lú-Olo hatan ba kestaun bankada CNRT walk out husi sesaun plenária PN ne’e problema PN nian, la’os PR nia problema.
“Prezidente Repúblika mai iha Parlamentu Nasionál hanesan orgaun soberania ida para loke sesaun lejíslativa, agora abandona ka la abandona ida ne’e problema sira nian,” dehan Prezidente Lú-Olo.
The Oe-Kusi Post observa, Primeiru-Ministru, Taur Matan Ruak la marka prezensa iha eventu ne'e, maibé nia membru governu sira kuaje partisipa tomak.
