DILI (TOP) – Prezidente Komisaun E ne'ebé responsavél ba assuntu Infra-Estrutura Abel Pires informa Timoroan iha ona kapasidade atu operasinaliza ro-ahi Berlin Nakroma, tanba ne’e la presiza estrajeiru mak lori ho saláriu internasional.
"Foin dadauk komisaun E ba halo fiskalizasaun iha Oe-Kusi Ambeno ho ro-ahi Kay Rala ne'e, nia Kapitaun Timoroan ne'ebé sira nain rua mak lori depois, lor-loron sira fahe malu fó hanorin malu oinsá atu halo viajén. Ita laiha problema boot kona ba kapasidade, maibé ha’u hanoin husi ba ministeriu transporte komunikasaun para ba oin loke kompetisaun, loke dalan ba Timoroan atu kompete," hateten Prezidente komisaun E ba asuntu Infra-Estrutura deputadu Abel Pires ba jornalista sira iha Parlamentu Nasionál, kinta 27 agustu 2020.
Deputadu ne'e esplika, tanba sa maka ro-ahi Berlin Nakroma nakonu ho kapital no mós ema sira serbisu husi liur tanba uluk kedas ita fó fiar ba kompañia Indonézia maka halo jestaun, maibé agora labele kontinua tanba, tuir deputadu ne’e katak nia hatene iha ona Timoroan lubuk maka iha ona kapasidade atu lori Ro-ahi Nakroma.
"Sei karik Timoroan mak kaer ro ahi Nakroma ita manan dalarua sira nia saláriu ne'e nasionál, la’os saláriu internasionál, segundu ita tenke fiar ba Timoroan rasik tanba ita ukun rasik aan ona ninia markasaun ida mak Timoroan ida ka’er responsabilidade importansia," nia esplika.
Prezidente komisaun E ne'e konta, durante ne'e, Ministeriu Transporte halo kontratu ho kompañia Indonézia, maibé nia hanoin ne'e tenke para ona, tanba realidade Crue nian mós Timoroan barak ona foin dadauk komisaun E sira ba treinu kleur iha Malazia sira iha kapasidade, maibé sira laiha serbisu no laiha oportunidade.
"Ha'u hanoin Ministériu Transporte kuandu hasai konkursu ba kapitaun ro-ahi Berlin Nakroma ne'e, kapitaun Ro ahi Kay Rala ne'e bele operasinaliza," nia hateten.
Deputadu ne'e hatutan, Manutensaun ba ro ahi ne'e mós la’os buat boot tanba makina jerador babain sira ne'e. Motor ne'e la’os buat foun ida, agora dadauk UPM mak uza ema nain rua husi rai liur, maibé atu troka ida ne'e la’os buat boot ida, tanba ne'e la’os ona skill ne'ebé mak susar tebes.
"Ha’u optimista katak Timoroan bele tanba ha’u sa'e ona ro ahi Timoroan mak ka’er rasik, ha’u ko’alia ona ho sira Crue sira, tanba Timoroan sira treinu tinan ba tinan sira iha kapasidade nia problema mak ne'e," nia afirma.
Nia esplika, atu halo ratifikasaun ruma ne'e laos Parlamentu Nasionál mak propoin, Parlmentu Nasionál bele propoin tratadu bar-barak lei bar-barak, maibé kondisaun ministériu sira bele ka la'e ezekuta buat sira ne'e. Tanba ne'e mak inisiativu tenke mai husi ministériu sira, tanba sira hatene katak ne'e presiza, ne'e sira hala'o, sira mak propoin mai, entaun ita hatene kada ministériu sira nia kapasidade.
