DILI (TOP) – Diretór Sentru Integradu Integradu ba Jestaun Krize, Brigadeiru Jenerál F-FDTL, João Miranda "Aluc Descartes" ohin hasoru malu ho Primeiru Ministru, Taur Matan Ruak hodi deskute kona-ba posbilidade governu sei estende tan situasaun Estadu Emerjensia (EE) ba dalima.
Brigadeiru Jenerál, "Aluc Descartes" hatutan, númeru kazu moras Covid-19 iha nasaun viziñu Indonézia no Austrália agora sa’e makas, nune’e governu presiza tempu hodi deskute asuntu ne’e kle’an iha reniaun Konsellu Ministru para hare'e kestaun saúde hodi salva povu husi ameasa moras Covid-19.
“Ita hein Konsellu Ministru maka sei deskute, maibé ita haree katak situasaun agora ne’e sei mantein ho ritmu ida hanesan ne’e, bele estende Estadu Emerjensia. Ita hotu hatene katak, mezmu iha ita nia rain kazu Covid-19 ne’e rezista ida de’it, mais moras iha ita nia pais viziñu numeru sei makas. Ida ne’e bolu atensaun ba ita oinsá maka ita prevene liu husi medida prevensaun ne’ebé ita halo hela tenki forte, tanba dala ruma bele sei estende tan situasuan Estadu Emerjensia, tanba ita akompaña nasaun boot sira iha medicina kompletu, maibé to'o agora seidauk iha ai-moruk, e pior liután ita, tanba ne’e ita tenki evita,” dehan Lider Rezistensia FALINTIL Aluc Descartes ba jornalista, hafoin enkontru ho Primeiru Ministru, Taur Matan Ruak iha Palasiu Governu Dili, Segunda 24 Agustu 2020.
Nia hatutan, atu loke hikas fronteira terrestre sira iha Timor-Leste, governu presiza analiza situasaun Covid-19 iha nasaun viziñu inklui haree númeru ema sira ne’ebé kumpre iha kuarentena menus ona foin bele foti desizaun atu loke fronteira.
Mezmu, servisu Sala Situasaun Sentru Integradu Jestaun Krize insera ona iha loron 30 Jullho 2020, maibé ekipa balun sei kontinua servisu apoia Ministériu Saúde ho parseiru sira kontinua fahe maskára no ajuda ekipamentu saúde nian ba povu sira hodi kumpre nafatin regras saúde nian.
Iha parte seluk, Xefe Governu Taur Matan Ruak rasik husu ba Komandu Jerál PNTL liu husi Unidade Patrullamentu Fronteira (UPF) no Komandu FALINTIL Forsa Defeza Timor-Leste (F-FDTL) hodi halo seguransa makas kontrolla liña fronteira hodi evita populasaun atu viajen no halo atividade negosiu ilegál.
Tuir Lider rejistensia ne'e dehan, dadaun ne’e, Governu Timor-Leste regista pasiente estranjerus ida maka sofre hela moras Covid-19, maibé situasaun saúde pasiente ne’e rasik komesa di’ak no halo hela tratamentu saúde iha Sentru Izolamentu Vera Kruz Dili.
