DILI (TOP) – Primeiru Ministru, Taur Taur Matan Ruak hato’o apresiasaun boot ba esforsu serbisu, lider karismátiku, Kay Rala Xanana Gusmão ne’ebé kontinua tun direita ba liña fronteira rai-maran husi Bobonaro, Kovalima, Atauro no ba to'o Rejiaun Administrativu Espesiál Oe-Kusi Ambenu (RAEOA) hodi sosializa regra saúde ba prevensaun hasoru moras virus corona (Covid-19) iha rai-laran.
Nune’e mós, Diretór Sentru Integradu Integradu ba Jestaun Krize, Brigadeiru Jenerál F-FDTL, João Miranda "Aluc Descartes" deklara misaun COVID-19 ne’ebé Xanana halo ajuda tebes Governu Timor-Leste, liliu ba povu tomak atu luta hasoru Covid-19 ne’ebé ataka mundu tomak no Timor-Leste.
“Ha’u fiar katak, maun Xanana nia preokupasaun la’ós buat seluk, buat leet, maibé preokupasaun maka luta hasoru Covid-19, no governu mós louva kona-ba serbisu ne’ebé maun Xanana halo luta hasoru Covid-19hodi sosializa direita informasaun ba povu sira,” hateten Brigadeiru Jenerál F-FDTL, João Miranda "Aluc Descartes" ba jornalista, hafoin enkontru ho Primeiru Ministru, Taur Matan Ruak iha Palásiu Governu Dili, Segunda 24 Agustu 2020.
Aluc dehan, governu agradese tebes esforsu grupu organizasaun no sidadaun Timoroan sira ne’ebé koopera ho governu hodi sosializa informasaun no apoiu maskara no ekipamentu saúde nian ba populasaun no estudante Timoroan sira iha Timor-Leste.
"Instuisaun estadu apresia ba esforsu hotu-hotu ne'ebé estadu halo no individu sira halo tanba ita hotu nia preokupasaun oinsá mak ita atu evita moras Kovid-19 mai da'et ita nia ema," nia hateten.
