DILI (TOP) – Partidu Timor-Leste Forte (PATIFOR) halibur ona kartaun eleitóral rihun 30 sai na'in ba Partidu ne'e hodi kompete ba festa demokrásia iha rai-laran.
"Obrigadu no Parabéns ba maluk PATIFOR sira hotu ne'ebé serbisu halibur kartaun eleitóral prosesu besik rihun 30 ona. Obrigadu no parabéns ba maluk sira hotu ne'ebé prontu ho fuan hodi fó sira nia kartaun eleitóral atu sai na'in ba PATIFOR," Prezidente interinu PATIFOR Gregório Saldanha "Mouris" hateten liu husi konferénsia ba imprensa iha sede PATIFOR, Farol-Dili, Domingu 30 Agustu 2020.
Prezidente interinu PATIFOR Gregório Saldanha "Mouris" halo konferénsia ba imprensa iha sede PATIFOR, Farol-Dili, Domingu 30 Agustu 2020. Foto The Oe-Kusi Post/Marcelino Bata.
Nia hatutan, ohin iha tan kbiit no oportunidade hodi komemora konsulta popular ba tinan 21. Konsulta popular ne'e halo husi Nasóens Unidas nia mahon iha loron 30 agustu 1999 liu ba ne'e, hanesan momentu importante ne'ebé hakotu povo Timor-Leste nia terus naruk husi nasaun rai liur nia ukun.
"Tanba ne'e mak, ita hotu ne'ebé mak agora sei moris, iha obrigasaun atu fó obrigadu ba maromak, obrigadu ba matebian, as wa'in no mártires sira, inklusivamente bebe ka anju labarik sira ne'ebé mate iha funu laran. Nune'e mós obrigadu nain Rai Timor Leste nian hotu," nia informa.
Nia hato'o mós ba diresaun funu nian husi tinan 1975 to'o 1999 hanesan CCF, ASDT, FRETILIN no FALINTIL ba diresaun Frente Armada, Frente Kalndestina no Frente exterior ho Orgaun funu nian sira, CRRN, CNRM, obrigadu no parabéns ba Igreja Katólika ba organizasaun joventude estadantil sira, ba solidariedade internasional no ba Povu Maubere tomak ne'ebé brani foti desizaun deside rasik nia destinu.
"Aproveita ba loron komemorasaun konsulta popular ba tinan 21 ida ne'e hakarak deklara ba públiku katak tanba responsabilidade ba Povu Timor-Leste, ami timoroan lubuk ida hodi ami nia naran rasik harii ona iha Munisipiu Dili Partidu Timor-Leste Forte (PATIFOR) iha loron iha loron 30 Maiu 2020 liubá," nia hateten.
Nia konta, Ohin Partidu Timor-Leste Forte komemora fulan 3 ona ba loron moris nian, bebe ho idade foin fulan 3 ne'e prepara aan hela hodi ba rejistu nudar Partidu politiku ida legal, ba nia loron moris.
Prezidente interinu PATIFOR ne'e dehan, haree ba realidade politika no sosial ekonomika iha ita nia sosiadade mak PATIFOR lakohi lakon oportunidade atu halo apelu ba ulun boot politiku sira atu buka malu hakotu sira nia Naksalak liuhusi nahe biti boot hodi buka solusaun atu hadia fali sira nia relasaun hodi kaer hametin ita nia Unidade Nasionál atu nune'e bele fó atensaun liu ba dezemvolvimentu nasionál.
PATIFOR mós apela ba orgaun soberania sira, li-liu ezekutivu no lejislativu hodi fó atensaun boot ba servi no rezolve povu maubere nia moris susar hanesan Ai-han, bee moos, uma, saúde, edukasaun, agrikultura, infra-estruktura bázika, estrada rural, eletrisidade no seluk tan.
Author: Marcelino BataWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP.
Bandu atu simu envelope ka sasan ruma husi fonte informasaun sira.
