DILI (TOP) – Prezidente Interinu Partidu Timor Forte (PATIFOR), Gregório Saldanha "Mouris" fundamenta sai husi partidu Frente Revolusionario Timor-Lorosa'e Independente (FRETILIN) harii fali partidu foun, ne’e la’os pekadu.
"Primeiru, ita ninia konstituisaun Repúblika garantia direitu eskollidu, segundu, artigu 46 fó dalan tanba ne'e, la'os pekadu ha'u bele harii partidu seluk, terseiru, partidu ne'e ami harii hanesan responsabilidade, ami asume hamrik kontinua obra ne'ebé mak maun sira seluk halo ne'e," hateten Mouris liu husi konferénsia ba imprensa iha sede PATIFOR, Farol-Dili, Domingu 30 Agustu 2020.
"Ami la dezafia maluk sira seluk, kolega sira seluk no partidu sira seluk tanba ami alunu. Maun sira, Mestre sira tenke orgullu ba alunu, tanba alunu hakarak kontinua sira nia obra. Aman sira tenke orgullu tenke kontente tanba oan sira iha responsabilidade atu kontinua sira nia obra, ida ne'e, ha'u aprende husi sira, ha’u aprende husi diresaun luta nain sira hotu, ha’u aprende husi lider sira hotu katak ita tenke iha responsabilidade atu kontinua serbisu ba ita nia povo no ita nia rai, ne'e de’it," nia hateten.
Nia hatutan, PATIFOR, hamrik uza sira nia naran rasik, la uza organizasaun ruma nia naran, la uza ema seluk nia partidu nia naran no laiha ema ruma mak hamrik iha kotuk.
"Ha’u fiar ema balun deskonfia no hakarak hatun ami dehan PATFIRO ne'e, ema balun mak iha kotuk, ne'e la'os. Ami uluk kedas iha Bapa nia tempu ami asume ami nia responsabilidade la'os foin agora, uluk kedas ami ladun ba ema seluk prontu ida ne'e responsabilidade ami tenke asume," nia konta.
"Ita ema mate mak sei laiha iha ona responsabilidade, maibé kuandu ita sei moris ita tenke asume responsabilidade ne'e, ami aprende husi ami nia mestre sira," nia afirma.
