DILI (TOP) – Bankada 3 iha Parlamentu Nasionál planeia ona sei uja polisia hodi ba hadau kadeira Prezidente Parlamentu Nasionál (PPN) nian bainhira deputadu sira husi partidu CNRT kontinua hakuak metin kadeira ne’e.
Esforsu atu hadau kadeira PPN iha parte dader hasoru kedas derrota boot ida, tanba hetan blokeia husi deputadu CNRT sira.
Notisia relevante: Bankada 3 hasoru derrota hadau kadeira PPN
Vise PPN, deputada Maria Angelina Lopez Sarmento husi Partidu Libertasaun Popular (PLP) ne’e hateten, bankada CNRT mak kontinua hakuak metin kadeira PPN ne’e krime, no sei tenta haruka polísia, ka’er no hatun husi meza PPN.
"Kuandu sira invade nafatin meza ami tenke halo asaun ida seriu hakarak ka lakohi ami tenke husu intervensaun polisia nian, tanba ida ne’e ilegal okupa meza PPN ne’ebé la’os kualker deputadu sa’e ba tur iha leten," hateten deputada Maria Angelina Lopez Sarmento ba jornalista sira iha Parlamentu Nasionál, Dili Segunda 18 Maiu 2020.
Iha fatin hanesan, Xefe bankada CNRT, deputadu Duarte Nunes katak, aktividade iha plenaria rejimentu Parlamentu Nasionál (PN) la fó dalan ba polísia tama iha sala plenaria, maibé seguransa PPN de'it mak bele tama.
"Polísia labele mete iha ne'e, atu primeiru ministru se de’it la mete ih ne'e, maibé kuandu sira uza forsa militár mai ne’e situasaun seluk," esplika deputadu Duarte.
Molok mosu asaun hadau kadeira PPN ne’e, PPN, Arão Noé de Jesus da Costa Amaral, akuza ona nia Vise PPN, Maria Angelina Lopez Sarmento ne’e viola ona lei lubuk ida, no konsidera nia asaun ne’e asalta poder.
“Aktu sira ne’e konsidera nu'udar hahalok hadau poder ne’ebé kontra Konstituisaun da Repúblika artigu 99 alina 3, Rejimentu Parlamentu Nasionál Artigu 22 no Lei Organizasaun Funsionamentu Administrasaun Parlamentar artigu 7,” esplika Arão.
Notisia relevante: Vise PPN obriga Quintiliano Ase ajenda plenária
Etretantu pozisaun bankada PLP, KHUNTO, no FRETILIN sei nafatin buka dalan hodi tenta hadau meza Prezidente Parlamentu Nasionál.
