DILI (TOP) – Vise Prezidente Parlamentu Nasionál (VPPN), Maria Angelina Lopez Sarmento hateten, deputadu sira husi bankada CNRT halo invazaun ba meja Parlamentu Nasionál ho “violénsia” de’it hodi manan simpatia.
Nia hatutan, sira nia prontidaun atu lidera meja ida ohin ne’e ho objetivu katak ajenda ida ne’e la lori ba iha lider bankada sira, sira halo tiha abertura ho baze ba rekerimentu deputadu nain 34 ne’ebé husu vise PPN nain-rua atu prezide plenaria, tanba Prezidente iha impedimentu, ho nune’e mak sira so’e ba plenaria atu propoin ajenda saida mak plenaria hakarak ko’alia iha loron plenaria ida ohin.
“Aktu invazaun husi deputadu CNRT sira ba iha meja Parlamentu Nasionál ne’e, signifika katak sira lakonsege debate ho argumentu. Sira so bele halo ho violénsia de’it ona,” hateten deputada ne’e ba jornalista sira iha sala plenaria PN, Dili Segunda 18 Maiu 2020.
“Ho violénsia de’it sira manan atu gaña simpatia. Se iha rajaun karik tanba sa la mai tuur iha ne’e hodi debate ho argumentu, se ataka ona ho violénsia ne’e signifika rajaun lakon ona, laiha ona rajaun. Legalidade mós mós laiha ona, rajaun mós laiha ona,” nia afirma.
Nia hatutan, bainhira deputadu sira husi CNRT mak halo nafatin invazaun ba meja PN no hakuak metin kadeira PPN ne’e, sei husu apoiu husi polisia hodi halo intervensaun.
“Orsida ami sei hare, se sira invade nafatin meja ami tenke hola asaun ida sériu ne’ebé hakarak ka lakohi tenke husu intervensaun polisia nian, tanba ida ne’e ilegal ba okupa meja ne’ebé la’ós kualker deputadu bele sa’e ba tuur iha ne’eba,” nia esplika.
Notisia relevante: Bankada 3 sei uja polisia ba hadau kadeira PPN
Iha fatin hanesan, Xefe bankada CNRT, deputadu Duarte Nunes katak, aktividade iha plenaria rejimentu Parlamentu Nasionál (PN) la fó dalan ba polísia tama iha sala plenaria, maibé seguransa PPN de'it mak bele tama.
"Polísia labele mete iha ne'e, atu primeiru ministru se de’it la mete ih ne'e, maibé kuandu sira uza forsa militár mai ne’e situasaun seluk," esplika deputadu Duarte.
Molok mosu asaun hadau kadeira PPN ne’e, PPN, Arão Noé de Jesus da Costa Amaral, akuza ona nia Vise PPN, Maria Angelina Lopez Sarmento ne’e viola ona lei lubuk ida, no konsidera nia asaun ne’e asalta poder.
Notisia relevante: Vise PPN obriga Quintiliano Ase ajenda plenária
“Aktu sira ne’e konsidera nu'udar hahalok hadau poder ne’ebé kontra Konstituisaun da Repúblika artigu 99 alina 3, Rejimentu Parlamentu Nasionál Artigu 22 no Lei Organizasaun Funsionamentu Administrasaun Parlamentar artigu 7,” esplika Arão.
Etretantu pozisaun bankada PLP, KHUNTO, no FRETILIN sei nafatin buka dalan hodi tenta hadau meza Prezidente Parlamentu Nasionál.
