𝐃𝐈𝐋𝐈 (𝐓𝐎𝐏) - Parlamentu Nasionál liu husi sesaun plenária ordinária iha loron 2 Juñu 2025, Deputadu sira aprova ona iha jeneralidade ba Proposta Lei Número 13/VI(2.ª) - Kódigu Rekuperasaun Insolvénsia, ho votus afavor 49 no abstensaun 2.
"Proposta Lei Kódigu Rekuperasaun Insolvénsia" ka Kódigu Insolvénsia no Falénsia (IBC) maka lei ida ne'ebé fornese enkuadramentu ida atu rezolve insolvénsia empreza sira, indivíduu sira, no parseria sira nian iha tempu ne'ebé determinadu.IBC hakarak atu maximiza valór ativu sira-nian, promove empreendedorizmu, no halo balansu entre interese sira hosi parte interesada hotu-hotu.
Exselensia Vise-Primeiru-Ministru no Ministru Koordenadór ba Assuntu Ekonómiku, Ministru Turizmu no Ambiente, Dato’ Seri Francisco Kalbuadi Lay esplika, Proposta Lei kódigu rekuperasaun insolvénsia ne’e, importante tebes atu favorese no aumenta konfiansa investor ho setor emprezariál sira iha Timor-Leste.
“Tanba até agora TL seidauk iha rejime efetivu ida kona-ba insolvénsia, no situasaun ida ne’e mak bele estraga funsionamentu merkadu ba emprezariu sira,” esplika Exselensia Vise-Primeiru-Ministru no Ministru Koordenadór ba Assuntu Ekonómiku, Ministru Turizmu no Ambiente, Dato’ Seri Francisco Kalbuadi Lay durante sesaun plenaria iha Parlamento Nasionál, Segunda, 02 Juñu 2025.
Vise - PM ne’e Hatutan, Proposta Lei ne’e, hala’o ona kompromisu internasional, inklui Organizasaun Mundial ba Komersiu (OMK) no mós prosesu integrasaun ASEAN hodi fó solusaun ba problema ne’ebé emprezariu sira enfrenta iha situasaun instável.
Objetivu prinsipal husi Proposta Lei ne’e mak atu kria regime legal ida ne’ebé klaru atu permite empreza sira rekupera fali bainhira hetan situasaun insolvénsia ka se viável no taka empreza sira ne’ebé la iha possibilidade atu rekupera.
“Vantazen ida ne’e mak fó prioridade ba empreza sira atu halo rekuperasaun karik la iha viável tenki taka liu likidasaun; estabelese mekanizmu efisiente hanesan balkaun ba rekuperasaun no insolvénsia BRI, no administrador rekuprasaun ho insolvênsia ka (ARI) hanesan entidade ida responsável ba rekuperasaun no insolvénsia”.
Proposta Lei ne’e mós fó enfaze ba solusaun administrativa ne’ebé lidera husi Governu atu garante efetividade no supervizaun no ajusta realidade iha Timor.
Proposta Lei ne’e mós atu asegura estabilidade ekonomia, ajuda empreza sira ne’ebé iha problema finanseira atu la fó valensia direta maibé, simu tempu ka sei fó oportunidade atu reorganiza hodi kontinua funsiona.
Asegura mós kampu serbisu ba Timoroan sira, asegura empreza no fó tempu atu halo rekoperasaun hodi nune’e sidadaun sira bele kontinua iha empreza ne’ebé hetan rekoperasaun. Proposta Lei ida ne’e bele fó klareza kona-ba insolvensia, bele fó konfiansa ba investor sira no instituisaun finanseira sira atu investe iha Timor-Leste tanba, sira hatene katak, sistema legal bele rezolve problema dívida ho justu.
Rezultadu votasaun iha jeneralidade afavor 49 no abstensaun 2. Ne’ebé Lei ne’e passa iha jeneralidade.
Depois de aprovasaun, Meza anúsiu katak diskusaun especialidade entrega ba Komisaun A no Komisaun D.
