DILI (TOP) — Governu liu-husi Sekretariu Estadu Formasaun Profisionál no Empregu (SEFOPE) Alarico de Rozário hateten to’o oras ne’e seidauk hatene kona-ba Timoroan nain 7 ne’ebé abandonadu iha Abu Dhabi, Uniaun Emiradu Árabe.
“Buat hotu ema nia direitu, maibé ita nia direitu mós tenke hatene regra. Regra sira hanesan ne’e, ajensia sira ne’ebé mak lori ema ba iha Portugál no Abu Dhabi la liu husi ami, ami la hatene nein iha, halo komunikasaun no halo koordenasaun ne’ebé ami la hatene. Ida ne’e SEFOPE la hatene,” Alarico hateten ba jornalista sira iha Tower Fatuhada, Dili Segunda 27 Juñu 2022.
Alarico dehan durante ne’e SEFOPE serbisu hamutuk ho Ministériu Negósiu Estranjeiru no Kooperasaun (MNEK) hatene de’it katak nasaun rua ne’e mak Timoroan sira ba serbisu iha Koreia no Sul no Australia.
“Sidadaun sira ne’ebé mak ba serbisu iha rai seluk ita nia governu tenke hatene.”
Iha parte seluk, diretór ezekutivu Forum Organizasaun Naun-Govermentál Timor-Leste (FONGTIL) Valentim da Costa Pinto sente preokupadu tebes ho SEFOPE ne’ebé durante lakohi atu buka hatene tuir Timoroan sira ne’ebé serbisu Inglatera, Portugál no Abu Dhabi.
“Ami nia rede sektoral sira sei tau matan ba traballador ninian ami sei kontinua husu tenke tau atensaun ba problema hirak ne’e, ita sei labele limita tanba ema ida-idak ba ho ninia esforsu, maibé governu hanesan na’in iha nesesidade tenke halo buat ruma, tenke tau matan ba ajensia sira ne’ebé mak fasilita ne’e sé mak responsabilidade, sira ba iha nasaun ne’ebé karik governu tenke hatene hodi bele tau matan atu salva ita nia sidadaun sira ne’e,” Diretór ezekutivu Forum Valentim da Costa Pinto hateten ba The Oe-Kusi Post (TOP) iha nia kna’ar fatin, Kaikoli- Dili, Segunda 27 Juñu 2022.
diretór ezekutivu Forum Organizasaun Naun-Govermentál Timor-Leste (FONGTIL) Valentim da Costa Pinto. Foto TOP/Marcelino Bata.
Diretór FONGTIL ne’e dehan, governu tenke halo regra ida ne’ebé mak rigorozu labele fó espasu hanesan fleksibilidade ba joven hotu joven sira ba serbisu iha estranjeiru hanesan problema ida ne’ebé mak Estadu finje.
“Ami hanoin katak asuntu joven ba serbisu iha estranjeiru ne’e hanesan fenomena ida ne’ebé mak ita labele satan ita nia joven sira ba iha estranjeiru sira finansia rasik sira ninia aan. Ami respeita nafatin sira nia inisiativa, maibé ita hakarak ita nia governu no ita nia estadu tenke halo intervensaun ruma,”nia hateten.
Nia husu ba governu tenke halo intervensaun no kontrola ba ajensia sira ne’ebé mak fasilita joven Timoroan sira ba iha estranjeiru presiza hare. Tanba iha estranjeiru mós iha nia lei.
Feto Timoroan nain 7 oras ne’e abandonadu hela iha Abu Dhabi. Tuir informasaun katak, sira sai husi Timor-Leste ba Uniaun Ermiradu Árabe ho objetivu atu ba serbisu ne’ebé mak fasilita husi ajénsia nasionál balun iha Dili laran, ikus mai sira tenke hasoru problema boot iha kapital Abu Dhabi.
Kona-ba kestaun ne’e, Ministru Prezidensiál Konsellu Ministu (MPKM), Fidelis Manuel Leite Magalhães promete, sidadaun Timoroan na’in hitu (7) ne’ebé mak hasoru hela dezafiu iha sidade Abu Dhabi sei lori hikas mai Timor Leste (TL).
“Mas o que certo ba repatriasaun Governu la taka matan ba nesesidade urjensia husi situasaun ida ne’e, husi parte ezekutivu tenke halo knaar hotu posivel para ita bele responde situasaun hirak ne’e,” Portavoz Governu, Fidelis Manuel Leite Magalhães hateten asuntu ne’e ba jornalista sira iha komferensia imprensa hafoin konsellu Ministru (KM) iha Palasiu Governu, Dili, Kuarta, 29 Junu 2022.
Nia hatutan, ba asuntu ida ne’e, horbainhira hasoru Prezidente Repúblika José Manuel Ramos Horta nia kolia tiha ona maibé atu repete fila-fali katak parte governu halo esforsu hotu no parte Ministra Negosiu Estranjeiru no Kooperasaun (MNEK) mós halo ona komunikasaun ho reprezentasaun diplomatika Emirados Árabes Unidos.
Ministru Prezidensiál Konsellu Ministu ne’e esplika, atu solusiona ho lalais situasaun ida ne’e, nia rasisk simu ona komunikasaun korespondensia husi Ministra Negosiu Estranjeiru no Kooperasaun (MNEK) relata ona informasaun ba resposta ne’ebé mak sira halo.
“Ita akompañia husi Parte ita nia esforsu ne’ebé mak Ministra Negosiu Estranjeiru no Kooperasaun (MNEK) halo. Agora Ministeriu Negosiu Estranjeiru no Kooperasaun (MNEK) hare parte ita nian justisa mós halo serbisu.”
“Ministra Negosiu Estranjeiru no Kooperasaun (MNEK) informa ona ba parte embaixada sira liu-liu United Emirat Arab, ita nia parte Ministériu Justisa ne’ebé mak tau matan ba interpool sira ne’e hotu mak halo serbisu, no Polisia Sientifika Investigasaun Kirminál (PSIK) ne’e iha Ministériu Justisa hanesan ita boot hatene PSIK halo sira serbisu,” nia esplika.
Portavoz governu ne’e akresenta, Polisia Sientifika Investigasaun Kriminál (PSIK) iha hodi halao sira nia serbisu governu lalika komentariu tanba prosesu ne’ebé mak la’o hela iha Ministeriu Justisa nian sei rai hela iha segredu justisa.
Author: Marcelino BataWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP.
Bandu atu simu envelope ka sasan ruma husi fonte informasaun sira.
