DILI (TOP) – Estratejia politika lideransa partidu FRETILIN nian oras ne’e uja tátika la’o ketak-ketak hodi konsolida aan atu hasoru kongresu nasionál partidu nian ne’ebé sei akontese iha tempu badak.
Prezidente Partidu FRETILIN Francisco Guterres Lú Olo ne’ebé hasoru derota boot ida iha eleiasun prezidensial hahu husi ronde dahuluk to’o ronde daruak iha Abril liuba oras ne’e hisik kosar maka’as hodi buka massa ba kongresu nasionál partidu nian. Nune’e mós Sekretariu Jeral partidu FRETILIN Mari Bim Amude Alkatiri ne’ebé kontribui maka’as “hamout no halakon” kandidatu Lú Olo nian iha eleisaun prezidensial liuba ne’e mós oras ne’e halo serbisu maka’as hodi buka masa hotu.
Tuir Komunidade ba Imprensa ne’ebé The Oekusi Post (TOP) asesu husi pájian ofisial Francisco Guterres Lú Olo katak, lideransa FRETILIN nain rua ne’e oras ne’e ses malu tiha hodi ba halo konsolidasaun partidu nian. Ida ba lorosa’e, ida ba loromonu. Alkatiri mak ba parte lorosa’e, no Lú Olo ba parte loromonu.
Estratejia la’os ses malu ne’e ho objetivu atu halo konsolidasaun para halibur hikas militante no kuadru sira iha baze hodi hasoru kongresu nasionál partidu ne’ebé sei realiza iha tempu badak, hodi hili hikas lideransa fóun ba partidu istoriku ne’e molok tama ba iha festa demokrasia 2023.
Komunikadu ne’e katak iha semana ne’e nia laran Lú Olo sei kontinua ba Bobonaro no Likísa hodi responde ba ajenda partidu nian ne’ebé iha. Remata husi munisipiu rua ne'e, prezidente partidu ne’e sei termina vizita ida ne'e iha kapital Dili. Enkuantu, munísipiu sira husi zona leste hanesan Baukau, Lautem no Vikeke sei kobre husi sekretáriu jerál FRETILIN, Mari Alkatiri.
Bainhira asumi hikas fali funsaun hanesan prezidente FRETILIN, hafóin remata mandatu nu'udar xefe estadu hanesan kargu ida ne'ebé aas liu iha RDTL durante tinan 5, Francisco Guterres Lú Olo hala'o hikas fali nia serbisu hodi serbi FRETILIN.
Haktuir nafatin iha komunikadu ne’ebé TOP asesu katak, bainhira dirize reuniaun traballu partidu ne'ebé realiza iha munísipiu Aileu, Ermera no Ainaro kontinua kedas ba iha Kovalima ho ajenda ne’ebé hanesan.
Halo konsolidasaun ho estrutura no kuadru FRETILIN, reprezentante organizasaun massas FRETILIN, organizasaun filliada FRETILIN no kuadru tékniku militante sira ho objetivu fahe infórmasaun no fó orientasaun serbisu kona-ba preparasaun sira hasoru Kongresu FRETILIN ba dálimak (5), no serbisu importante sira seluk hasoru eleisaun parlamentar 2023.
Ba militante no kuadru sira Lu Olo hatete liuhusi kongressu mak dalan atu hametin partidu istoriku ne'e, no renova lider másimu FRETILIN la'os atu fahe malu.
"Husu delegadu sira partisipa iha kongresu ne'e ho didi'ak hodi halo desizaun di'ak ba vida partidu, manan no lakon kontinua iha partidu laran, se lakon halai sai husi partidu sei la hetan dalan, tanba faktu hatudu ona no ida manan kontinua nafatin hala'o serbisu ba FRETILIN," Lu Olo fundamenta iha komunikadu ne’e.
No, ikus liu Lu Olo la haluha agradese ba partisipante sira tomak ne’ebé partisipa ona iha atividade konsolidasaun ne’e, nafatin husu ba oin la'o hamutuk suporta malu hodi fó vitoria ba FRETILIN iha eleisaun parlamentar 2023.
