CNRT ho PLP izola FRETILIN iha nomeasaun prezidente CNE

DILI (TOP) —  Bankada Congresso Nacional de Reconstrução de Timor-Leste (CNRT) ho bankada Partidu Libertasaun Popular (PLP) “futu-lia” iha Parlamentu Nasionál hodi tebe-sai Alcino de Araújo Baris husi Prezidente Komisaun Nasional Eleisaun (CNE).

Iha aprezentasaun lista kandidatu ba membru efetivu ba CNE ne’e, Bankada FRETILIN propoin Alcino de Araújo Báris (atuál prezidente CNE), Bankada CNRT propoin Odete Maria Belo (atuál komisária CNE) no Bankada PLP propoin José Agostinho da Costa Belo (atuál komisáriu CNE). Maibé, iha prosesu votasaun ne’e ho eskrutíniu sekretu maibé rezultadu eleisaun kandidatu husi Bankada Bankada nian liu no Bankada FRETILIN nian la liu, nune’e Alcino Baris de Araújo sai de’it membru ba CNE.

Bankada CNRT nia kandidatu la kompete iha eleisaun ba prezidente CNE foun, maibé kandidatu hosi Bankada FRETILIN, Alcino de Araújo Báris (atuál prezidente CNE) no Bankada Partidu Libertasaun Populár (PLP), José Agostinho da Costa Belo maka kompete iha eleisaun  ne’e. Rezultadu votasaun liuhusi eskrutíniu sekretu ne’e kandidatu Alcino de Araújo Báris hetan de’it votu 29 no kandidatu José Agostinho da Costa Belo hetan votu 35. Nune’e kandidatu hosi Bankada PLP nian sai nu’udar Prezidente CNE foun.

“Ba kandidatu Alcino de Araújo Báris hetan 29 votu no kandidatu José Agostinho da Costa Belo, hetan votu 35. Nune’e meza anunsia rezultadu votasaun Prezidente CNE ba períodiu 17 agostu 2021 ba oin ho mandate tinan lima. Dejeza bom trabalho no susesu ba Prezidente CNE foun ho komisáriu foun ne’ebé ohin ita hili,” Prezidente Parlamentu Nasionál, Deputadu Aniceto Longuinhos Guterres Loeps, anunsia liuhosi plenária Parlamentu Nasional, Dili, kuarta 14 Jullu 2021.

Entretantu, kona-ba membru suplemente sira Bankada Partidu Demokrátiku (PD) propoin José Pedro Camões (advogadu), Bankada KHUNTO propoin Querubin Jong Ferreira, Bankada Frente-Mudança (FM) propoin Fátima Sarmento Ximenes, nu’udar membru Konsellu Pegagójiku no Sientífiku iha (DLP).

Purtantu Bankada Uniaun Demkorátika Timorense (UDT) propoin Octavio Manuel da Costa Amaral (advogadu).

Liuhusi votasaun eskrutíniu sekretu, José Pedro Mariano Neves de Camões hetan votu 39 nune’e sai suplente dahuluk, Fernanda de Fátima Sarmento Ximenes, hetan votu 35 sai nu’udar suplente daruak no Querubin Jong Ferreira, hetan votu 33 nune’e sai suplentu datoluk.

Entretantu lista membru ne’ebé dezigna ona husi órgaun kompetente ba CNE mak hanesan Prezidente Repúblika nomea ona Olávio da Costa Monteiro de Almeida nu’udar membru efeitivu ba CNE no Detaviana Madalena Guterres Freitas, nu’udar membru suplente. Ne’e previstu iha dekretu Prezidente Repúblika númeru 41/2021, 1 jullu.

Carlito Martins nomea hosi Governu nu’udar membru efetivu no Elvino Bonaparte do Rêgo, nu’udar membru suplente (karta ofisiál haruka iha loron 9 jullu 2021).

Majistradu judisiál Antonino Gonçalves eleitu nu’udar membru efetivu no João Ribeiro nu’udar suplemente, ne’e dezigna husi Tribunál Rekursu, ne’ebé haruka iha loron 30 juñu 2021. Majistradu hosi Ministériu Públiku, Domingos Barreto eleitu nu’udar membru efetivu no Napolião Soares da Silva nu’udar membru suplente (karta ofisiál haruka iha loron 5 jullu 2021).

Bazeia ba lei órgaun administrasaun eleitorál katak, Prezidente Parlamentu Nasionál mak sei fó pose.

Marcelino Bata
Author: Marcelino BataWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP. Bandu atu simu envelope ka sasan ruma husi fonte informasaun sira.

PUBLISIDADE

Online Counter