DILI (TOP) – Embaixador Estadus Unidus Amérika (EUA) ba Timor-Leste, C. Kevin Blackstone foin maka hala’o nia misaun diplomasia iha Repúblika Demokrátika Timor-Leste (RDTL) durante fulan 6 nia laran, maibé sei desidi rezigna aan husi nia serbisu diplomasia iha Timor-Leste, tanba rajaun pessoal.
“Tanba sirkunstánsia pesoál urjente, ha’u sei rejigna an husi kargu Embaixadór no sei fila hikas ba Estadus Unidus iha inísiu fulan Agostu ne’e. Onra ida ba ha’u, iha ha’u nia moris tomak mai servi hanesan Embaixadór EUA ba Timor-Leste no serbisu hamutuk ho funsionáriu dedikadu, profisionál husi Misaun EUA nian iha Timor-Leste,” esplika embaixador Blackstone liu husi Komunikadu ba Imprensa ne’ebé The Oe-Kusi Post (TOP) asesu husi pájina ofisial U.S. Embassy - Dili, Timor-Leste Segunda, 02 Agustu 2021.
“Laran di’ak Timoroan sira nian impresiona ha’u no ha’u sei rai metin memória barak ne’ebé ha’u hetan durante ha’u nia tempu iha ne’e. Ha’u sempre nafatin orgullu profundamente ho servisu Misaun EUA nian hodi hametin parseria importante no rohan laek – no amizade -entre Estadus Unidus no Timor-Leste,” embaixador Blackstone afirma.
Diplomata Amerikanu ne’e troka embaixadora Kathleen Fitzpartrick ne’ebé nia misaun remata ona iha fulan Novembru 2020. Embaixador Blackstone simu posse iha Casa Branca (White House) nu’udar embaixador EUA ba Timor-Leste iha loron 06 Janeiru 2021, no to’o Timor-Leste iha loron 04 Fevereiru 2021.
Iha nia diskursu tomada posse katak, Timor-Leste nu’udar nasaun demokrasia foun liu durante tinan 20 nia-laran ona, sai tia ona ezemplu di’ak ba seluk iha nia fortalesimentu instituisaun demokrátiku sira, liberdade imprensa, no ninia rezilénsia ba dezafiu sira.
“Ha’u espera bele halo saida maka ha’u bele halo atu hametin liutan relasaun entre Timor oan no Amerikanu sira.”
Kevin Blackstone, membru kareira ida husi Servisu Superiór Negósiu Estranjeiru, Klase Ministru-Konselleiru, konfirmadu ona nu’udar Embaixadór Estadus Unidus Amérika ba Repúblika Demokrátika Timor-Leste iha loron 22 fulan Dezembru 2020, maibé foin maka hala’o nia misaun diplomasia fulan 6 de’it nia desidi sei rezigna aan, tanba rajaun pessoal urjente ida tenke fila ona ba Estadus Unidus Amérika.
Embaixadór Blackstone hala’o ona nia knaar hanesan Diretór Ezekutivu iha Gabinete Asuntus Ázia Leste no Pasífiku hahú husi fulan Jullu 2017 to’o Setembru 2020. Hanesan Ofisiál Servisu Estranjeiru dezde 1991, Embaixadór Blackstone antes ne’e hala’o kna’ar nu’udar Ministru-Konselleiru ba Jestaun Embaixada Estadus Unidus iha Kairo, Ejiptu, no Konselleiru Jestaun ba Estadus Unidus nia Embaixada sira iha Bangkok, Tailandia no Nova Delí, Índia.
Husi tinan 2009-2010, Embaixadór Blackstone sai hanesan Líder Ekipa ba Estadus Unidus nia Ekipa Rekonstrusaun Provinsiál iha Wasit Irake. Antes ne’e, nia serbi ona iha misoens konsulár no jestaun iha Nijéria, Uganda, Gabon, Itália, Kanada, Índia, no Ejiptu.
Nia mós hala’o ona knaar nu’udar Ofisiál Programa iha Departamentu Estadu nia Gabinete Populasaun, Refujiadus no Migrasaun, inklui tinan ida diriji Gabinete nia Sentru Prosesamentu iha Washington hodi simu refujiadu sira husi antiga Uniaun Soviétika.
Blackstone hasai Lisensiatura iha Universidade Virjinia no Mestradu Administrasaun Públika husi Eskola Maxwell, Universidade Syracuse. Nia no ninia espoza Alexandra nu’udar inanaman ba oan adultu nain rua.
