Horta sei sukat buat barak molok kandidata aan ba PR

DILI (TOP) — Kalendariu eleitoral ba eleisaun Prezidensial sei akontese iha tinan oin, 2022, no eis Prezidente Repúblika, José Manuel Ramos Horta maske to’o oras ne’e seidauk foti desijaun definitivea ida hodi kandidata aan maibé, iha posibilidade atu kandidata aan.

“Posibilidade sempre iha, ita nunka hatete laiha posibilidade ema barak mai ko’alia ho ha’u para kandidatu aan fali, ha’u sei sukat buat barak,” katak Horta ba jornalista sira hafoin remata audiensia ho Primeiru Minsitru Taur Matan Ruak, iha rezindensia Xefe Governu iha Fárol, Dili Tersa 01 Juñu 2021.

Horta dehan, durante tinan 10 ona, nia parte la asume funsaun ofisial ruma iha estadu maibé, sempre ajuda no tulun rai ida ne’e.

"Ha’u tinan 10 ona la tama iha funsaun ofisial ruma iha estadu nia laran, ha’u okupadu teb-tebes ho buat ne’ebé ha’u halo buka halo di’ak sempre buka ajuda hodi tulun rai-ida ne’e,” Horta afirma.

Eis Prezidente Repúblika ne’e katak, tanba buat balu nia halo, halo husi kotuk importante maka rezultadu iha di’ak ba rai ne’e, di’ak ba governu.

“Ha’u nia hanoin sempre hanesan ne’e ha’u nia obrigasaun maske ke ha’u la ho politika bele halo governu ne’e ha’u hatete la’e, ha’u tenke buka tulun governu”.

Nia hatutan, tanba iha governu la’os buat foun, tanba razaun ruma impaktu ba povu duni nia hanoin sira atu koalia kona-ba politika mós nia sempre buka apoiu purtantu la presiza tama iha governu ka Prezidente para apoiu rai ida ne’e.

“Ha’u nia filosofia, seidauk halo desizaun sei hanoin lai, haree tok kandidatu seluk tan iha karik, ha’u seidauk lé, seidauk rona, sei sedu hela depois sei falta kuaze tinan ida”.

Marcelino Bata
Author: Marcelino BataWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP. Bandu atu simu envelope ka sasan ruma husi fonte informasaun sira.

PUBLISIDADE