DILI (TOP) – Tribunal Distrital Dili (TDD) hahu ona prosesu julgamentu dahuluk ba arguida Anabela Sávio atual deputada FRETILIN kona-ba kazu krime peculato de uso, tanba deskonfia uja seña kombustivel Estadu nian hodi ense fali ba kareta privadu iha tinan 2019.
Maske prosesu julgamentu foin maka hahu iha tinan ida ne’e, maibé tuir informasaun ne’ebé The Oe-Kusi Post (TOP) asesu iha pájina ofisial Fretilin iha Parlamento Nacional katak, kona-ba kazu enxe ‘señ/kupon’ kombustível Estadu nian ba karreta privada, deputada Anabela Sávio kondena maka’as mídia balun ne’ebé halo akuzasaun falsa hasoru nia iha tinan 2019. Liuliu mídia AMP (Aliança Maioria Parlamentar) no mídia ofisiál balun ne’ebé akuza deputada Anabela enxe ‘senhas’ kombustível ba ninia karreta privada bainhira uza ba pasiár ho ninia kaben no família hafoin ka’er toman husi pesoál Comissão Anti-Corrupção (CAC).
“Akontesimentu loloos, iha dia 9 fulan-abríl 2019, tuku 17:40 loraik, pesoál CAC prende dokumentu karreta nian bainhira deputada Anabela ninia kondutór enxe ‘senhas’ kombustível estadu nian ba karreta privada ho xapa-matríkula No 21-199 iha estasaun abastesimentu kombustível nian - Lafaek Oil and Gas Comoro,” katak arguida Anabela ne’ebé TOP sita iha pájina ofisial Fretilin iha Parlamento Nacional, Segunda 31 Maiu 2021.
Depois hetan kontaktu via telefone, deputada Anabela mós informa kedas funsionáriu Parlamento Nasionál (PN) ne’ebé bá esplika katak karreta privadu ne’e rejistadu iha Parlamentu Nasionál atu utiliza ba halo fiskalizasaun. Nune’e loron tuirmai dia 10 fulan Abríl 2021, pesoál CAC sira ne’ebé esklaresidu bá PN hodi hato’o deskulpa ba kondutór tanba dezentendimentu ne’e.
“Ida-ne’e tanba ‘senhas’ kombustível nian legál hodi enxe karreta privada ho xapa-matríkula No 21-199 ne’ebé rejistadu no hetan autorizasaun husi PN. Prátika ne’e deputadu sira seluk mós hala’o tanba PN la fasilita veíkulu ruma, ne’eduni sira tenke utiliza karreta privada hodi apoia fali serbisu PN nian. Inklui mós deputada Anabela husi kedas Kuarta to’o Kinta Lejislatura ohin loron, oferese ninia karreta privada, nein PN aluga ho $ 5 centavos ruma”.
Aleinde ne’e Deputada Anabela mós uza karreta ida ho xapa-matríkula No 88-37 maka oferese husi Bankada FRETILIN no rejistu iha PN, maibé ne’e eransa husi deputadu Terseira Lejislatura nian ne’ebé tuirloloos leilaun ona hodi sai karreta privada. Nune’e karreta ne’e ninia dokumentu sira seidauk klaru no labele utiliza ba hala’o serbisu iha fatin hotu liuliu ba Oecússi.
Infelizmente julgamentu iha Tribunál Distritál Díli nian ne’e, laiha reprezentante husi CAC maka ba asiste inklui mídia ofisiál balun ne’ebé halo akuzasaun falsa iha tinan 2019. Julgamentu ikus tuirmai sei hala’o iha dia 17 fulan-juñu tinan 2021.
Molok ba hatan iha Tribunal, deputadu sira iha PN hasai ona ninia imunidade iha loron 17 Maiu liuba ho votu afavor.
Arguida Anabela katak maske mosu propaganda oioin iha plata forma media sosial kona-ba nia kazu ne’e, maibé nu'udar povu nia reprezentante, prontu hatán iha tribunál ba ‘kupon’ kombustivel nian ne'ebé uza hodi fasilita viajén serbisu nian inklui fiskalizasaun ba Oe-Kusi Ambeno. Tanba husi kedas asume kargu deputada nian iha Quarta Legislatura to’o ohin loron, arguida Anabela utiliza ninia karreta privada ne’ebé rejistu iha Parlamento Nacional.
Mosu komentariu balun iha plata forma media sosial liliu iha Facebook katak, deputada FRETILIN Maria Anabela Savio Komete Krime Flagrante "Tertangkap Basah Mencuri" husi Comissão Anti Corrupsaun (CAC) ‘napk kombustivel iha Komoro”.
Iha loron Tersa lokoraik 09 Abril 2019, horas tuku 6 liu minutu 15 deputada FRETILIN, arguida Maria Anabela Savio hamutuk ho nia la’en uja kupon Parlamentu Nasional ense kombustivel ba nia kareta privadu marka Nissan X-treme ho plat 21.199 TLS.
Uja kupon patrimoniu Estadu hodi fó vantajen ba nia an nu’udar “krime reseptasaun agravada” tuir artigo 272.1, Codigo Penal Timor-Leste ne’ebé katak “ema ne’ebé ho intensaun atu hetan vantajen patrimoniál ba nia ka ba ema seluk, subar koiza ne’ebé ema seluk hetan ho krime hasoru patrimóniu, simu, fó hanesan peñór, halo ninian ho títulu naran ida, kaer, rai, entrega ka kontribui atu entrega koiza ne’e ba ema seluk, ka oin naran ida buka dalan ba koiza ne’e ka nia valór ka produtu ne’ebé sai diretamente hosi koiza ne’e atu hela iha nia liman ka ema-seluk nia liman sei hetan pena prizaun tinan 2 too tinan 8”.
Ho kazu ne’e, Ministériu Públiku nu’udar nain ba asaun penal akuza deputada Maria Anabela Sávio ho nia kaben ho krime peculato de uso ne’ebé iha Kodigu Penal Timor-Leste artigu 296 ho pena prijaun tinan 2.
Kazu ne’e prejide husi juiz singular José Gonçalves, Ministériu Públiku reprezenta husi Prokurador Jacinto Babo Soares, no arguida Maria Anabela Sávio defende husi advogadu privadu Arlindo Sanches.
