DILI (TOP) – Ministru Koordenador ba Ekonomia (MKAE) Juaquim Amaral hateten produtu lokal sira iha programa Cesta Bázika ne’ebé atu fahe ba povu sira iha Rejiaun Administrativu Espesial Oe-Kusi Ambeno (RAEOA) sei lori husi kapital Dili.
"RAEOA nia preparasaun kona-ba Cesta Bázika halo hotu ona. Tanba populasaun barak liu. Entaun produtu barak tenke lori husi Dili ba RAEOA meske produtu lokál más lubuk ida sei lori husi Dili ba Oe-Kusi Ambeno," hateten Ministru Joaquim ba jornalista sira iha Palásiu Governu, Dili, Kuarta 13 Janeiru 2021.
Governante mai husi partidu FRETILIN ne’e katak, Cesta Bázika ba Oe-Kusi Ambeno oras ne’e iha hela prosesu preparasaun. Tanba iha fulan Janeiru ne’e, Timor-Leste hasoru fali situasaun Estadu emerjensia dasia ho rigorozu tebes espesialmente ba Oe-Kusi Ambeno.
Nia hatutan, tuir loloos prosesu implementasaun programa Cesta Bázika ba Oe-Kusi Ambeno hahu ona, maibé pandemia Covid-19 ne’e maka impede.
Nia esplika programa Cesta Bázika iha munisipiu sira seluk maioria atu hotu ona, no ba Oe-Kusi Ambeno sei hahu iha tempu badak.
“Ha’u hanoin munisípiu Aileu, Ainaro, Likisa semana oin bele hotu ona ne’ebé serbisu la’o namanas hela, ita hein katak Fevereiru ne’e ita bele konklui ona programa ne’e”.
