PADIAE (TOP) — Susar no terus iha mundu rai-klaran mesak oioin de’it. Balun susar ba ai-han laiha, no balun susar ba buat barak. Matebian Carlota da Cunha mate husik hela nia oan nain 3, feto rua, no mane ida.
Oan ki’ak nain 3 husi inan matebian Carlota da Cunha no arguidu Domingos Timo oras ne’e sente hela susar kuran domin husi inan-aman. Oan ki’ak nain 3 ne’e, feto rua mane ida sira nia susar komplikadu itoan, tanba sira nia aman tenke ba kumpre ona nia hahalok tomak iha prijaun preventive Bekora, Dili, no sira nia inan fila ona ba mundu seluk. Oras ne’e sira lakon domin husi inan-aman, sira nia futuru ameasadu atu mout iha kalohan metan nia laran basa sira seidauk iha kbi’it naton hodi sustenta aan lor-loron. Susar no terus mundu nian sira hahu sente ona hafoin sira nia aman rasik fila oho tiha sira nia inan doben iha aldeia Bone-Mese (Boenmese), suku Naimeko, Oe-Kusi Ambeno iha loron Sábadu 6 Juñu 2020. Oan ki’ak nain 3 ne’e oras ne’e lutu metan hela ba sira nia inan doben.
Matebian Carlota da Cunha ho nia kaben arguidu Domingos Timo moris hamutuk nu’udar fen-laen tinan 25 ona, sira nia jornada moris ne’e tenke para ho ran fakar, ran suli ba rai. Sira nia relasaun familia relasaun fen laen tenke hapara ho sasan kroat. Carlota (35) ne’ebé mate iha sira nia fatin toba (kuartu-laran) tanba deskonfia malu de’it.
Notisia relevante: Hafoin halo’ot nia inan, Timo oho fali nia fen
Oan ki’ak nain 3, dadauk ne’e oan mane hala’o hela estudu iha nivel sekundaria, feto ida iha ensinu baziku (EBC), no ida ikus nian hala’o nia estudu iha pre-primaria
“Ami husi parte familia husu ba governu karik bele, la’os ejize maibé se bele tau netik atensaun ba nia oan sira,” hateten reprezentante familia matebian, Paulo Ribeiro iha semimonia funebre ne’ebé haloot iha semiterio Santa Kruz, Padiae suku Lalisuk, Oe-Kusi Ambeno iha loron Sesta 12 Juñu 2020.
Atual diretor PDHJ RAEOA ne’e esplika, razaun husu atensaun tanba sira nia inan (vitima) fila ona ba mundus seluk, no sira nia aman (arguidu) oras ne’e kumpre hela prizaun preventive iha prijaun Bekora, Dili.
“Tanba ne’e ami husu ba governu bele konsidera sira atu hetan tulun, atu nune’e sira bele kontinua sira nia estudu para bele finaliza netik sira nia eskola sekundariu maske la to’o universidade. No mós, bele entegra sira ba fatin orfonatu ruma ka ba fatin seguru ba sira tanba agora familia inan-aman fahe malu hodi husik hela sira,” nia husu.
