MAHATA (TOP) – Prezidente Autoridade ba Rejiaun Administrativa Espesial Oe-kusi Ambeno (RAEOA) no Zona Espesial ba Ekonomia Sosial Merkadu Timor-Leste (ZEESM-TL), Arsenio Paixão Bano foin mak tun husi ro ferry Berlin Nakroma iha portu Iwao Kita Hara Mahata, hahu halo ona ameasa ba sira ne’ebé oras ne’e assume hela kargu xefia sira katak bainhira halo serbisu la loos sei hasai sira ka muda sira ba fatin seluk hanesan uluk muda mestre sira iha tinan hirak liuba kotuk.
Bano lansa ameasa ne’e ho objetivu atu dezenvolve lalais Oe-Kusi Ambeno tenke sai hanesan Singapura. Inisiu implementasaun projetu pilotu ZEESM iha rai-ketan ne’e, Mari Alkatiri no Arsenio Bano rasik promete ona katak sei halo esforsu atu fila lalais Oe-Kusi Ambeno sai hanesan Singapura, maibé realidade hatudu dezenvolvimentu fiziku sira durante tinan lima konsentra de’it ba suku lima iha sub-rejiaun Pante Macassar. Sub-rejiaun tolu hanesan Nitibe, Pasabe no Oe-Silo nia kondisaun sira laiha mudansa to’o ohin loron.
“Ha’u la uza perasaan (sentimentu) barak liu iha ne’e, ha’u hatete de’it buat ida ba funsionáriu no diretor sira, se mak serbisu ha’u respeita nia, nia sei serbisu ba oin. Se mak la servis, ha’u sei halo prosesu ba nia, tanba interese ne’e Oe-Kusi Ambenbo mak tenki ba oin. Labele ema ida,. ema rua ninian,” Bano lansa ameasa ne’e iha portu Iwao Kita Hara, Mahata, Oe-Kusi Ambeno Sesta 19 Juñu 2020.
Bano mós sura hela nia kolen katak, nia so’e hela nia familia sira iha Australia ne’eba, ba Oe-Kusi Ambeno atu halo serbisu, la’os atu halimar.
“Ha’u mós lalakon buat ida, tanba ha’u mai husik hela ha’u nia familia iha rai dook ne’eba, hakarak fila-fali mai Oe-Kusi atu serbisu ba Oe-Kusi, ne’ebé ha’u lalakon buat ida kaundu ha’u aplika regra hirak ne’e bainhira Oe-Kusi ba oin,” Bano esplika.
Nia promete nudar primeiru prezidenti autoridade Oe-Kusi oan, sei halo mudansa ba dezenvolvimentu di’ak iha Oe-Kusi Ambeno no apela kedas ba povo Ambeno katak se mak sei asumi pasta membru autoridade tenki serbisu ho responsabilidade, neutralidade no tranparensia ba povo tomak.
“Ha’u atu dehan de’it mós katak Prezidenti Autoridade iha kompeténsia rekomenda no hapara sekretariu rejional sira, entaun iha tinan rua ka tinan ida sekretario rejional ida la serbisu ho seriu bele troka tau fali ema seluk,” nia promete.
