MAHATA (TOP) – Molok Prezidente Autoridade ba Rejiaun Administrativu Espesial Oe-Kusi Ambeno (RAEOA) no Zona Ekonómia Espesial Sosial Merkadu (ZESSM), Arsenio Paixão Bano to’o iha Oe-Kusi Ambeno, povu sira hahu ona halo prepasaun iha portu Mahata.
The Oe-Kusi Post observa iha prepasaun ne’e katak, povu sira simu Ambeno oan ne’e ho bidu no lisan rai-ketan ne’e nian. Nia ba Oe-Kusi Ambeno ho ro ferry Berlin Nakroma no tun iha portu Iwao Kita Hara Mahata iha oras tuku 7 dadersan.
Bano simu posse husi Primeiru-Ministru, Taur Matan Ruak hodi troka fali José Luis Guterres ba kargu Prezidente Autoridade RAEOA iha loron Sesta 12 Juñu 2020.
Iha portu ne’e ema barak tebes mak simu nia. Hafoin tun husi ro Nakroma, lia nain sira hatais nia ho tais Oe-Kusi Ambeno nian.
Iha portu Mahata, Bano katak nia rasik sente kontente tebes ba kargu ne’e, tanba ohin fila ba nia rain ne’e ho kargu Prezidente Autoridade.
“Ha’u kontente tanba sente honra, tanba ohin ha’u mai hanesan Prezidente Autoridade ba Oe-Kusi Ambeno, maibé ha’u hanesan Oe-Kusi oan la fasil mai hanesan Prezidente ba Oe-Kusi. Ne’e todan boot ida mak tau iha ha’u nia kabas, tanba mai serbisu ho ita boot sira hotu atu lori Oe-Kusi Ambeno ba oin,” hateten Bano iha portu Mahata, Oe-Kusi Ambeno, Sesta 19 Juñu 2020.
“Ha’u hakarak dehan la fasil, maibé difisil tebes mai ha’u tanba la’os buat ida imposibel, ita bele halo Oe-Kusi Ambeno sai sidade ida di’ak liu, entaun ha’u la mai sai Prezidente ba ema ida de’it, ba grupu ida de’it, maibé mai sai Prezidente ba hotu-hotu,” Bano promete.
Bano mós husu ba entidade hotu iha Oe-Kusi Ambeno atu hahu serbisu hamutuk ona kompara ho tinan lima (5) ba kotuk, Bano rasik konsentra de’it ba suku 5 iha sub-rejiaun Pante Macassar no hamosu diskriminasaun iha serbisu administrasaun públiku sira.
Nia dehan, sei atende preokupasaun hotu durante oras 24 nia laran, no sei la lakon tempu ba ema ida-rua nia problema, maibé sei konsentra maka’as liu atu oinsa bele dezenvolve Oe-Kusi Ambeno ba oin.
Antes ne’e serbisu administrasaun Estatal Oe-Kusi Ambeno hato’o ona konvite ba autoridade lokal sira iha suku 18 hodi mai simu Bano iha portu Mahata, maibé The Oe-Kusi Post observa katak, maioria autoridade lokal sira la partisipa hodi simu nia. Iha suku balun de’it mak simu Bano iha portu Mahata ne’e.
Para ona insulta malu iha media sosial
Bano mós husu ba Ambeno ona sira atu para ona insulta malu iha plata forma media sosial, maske durante ne’e grupu joven “FRETILIN” barak mak halo propaganda maka’as iha Oe-Kusi Ambeno via plata forma media sosial sira.
“Ha’u husu ho haraik aan ba ita boot sira ba ita Oe-Kusi hotu, para ona ho insulta malu odio vingansa, tanba ita nia objetivu ida de’it mak serbisu ba Oe-Kusi Ambeno. Ida ne’e de’it mak ha’u husu”.
“Ita lalika iha problema ba malu, ha’u nia maluk Oe-Kusi sira lalika iha problema ba malu, tanba ita nia objetivu mak lori dezenvolvimentu la’o ba oin. Ita nia objetivu mak lori ema atu mai investe osan iha Oe-Kusi Ambeno,” Bano esplika.
