NAKTUKA (TOP) – Primeiru-Ministru (PM), Kay Rala Xanana Gusmão sei hakerek karta bá Prezidente Repúblika Indonézia (RI), Prabowo Subianto hodi informa kona-bá konkordánsia atu realiza diálogu “Ko’alia nu’udar maun-alin” entre komunidade Naktuka, Suku Bene-Ufe, Sub Rejiaun Nitibe, Rejiaun Administrativa Espesiál Oecusse Ambeno (RAEOA) ho komunidade iha fronteira Desa Amfoang, kecamatan Amfoang Utara, Kabupaten Kupang, Nusa Tenggara Timur, Indonézia ne’ebé tuir planu sei realiza iha 10 Dezembru 2025.
Desizaun atu hala’o diálogu ne’e iha ona, tanba iha koordenasaun ne’ebé di’ak tebes entre autoridade sira hosi kecamatan Amfoang Utara ho Autoridade RAEOA nian.
Dutante vizita iha Naktuka iha loron Domingo, 30 Novembru 2025, Autoridade sira hosi Sub Rejiaun Nitibe atualiza kona-bá desizaun ne’e no Primeiru-Ministru, Xanana Gusmão fó apresiasaun másima, husu atu ko’alia didi’ak nu’udár maun-alin.
“Ha’u sei haruka karta ba Prezidente Prabowo hodi dehan katak, iha 10 Dezembru hahu dialogo entre komunidade. Ha’u husu ba TNI labele tama kahur, nune’e dialogo ne’e iha rezultadu ne’ebé di’ak ba ita hotu,” PM Xanana hateten ba komunidade sira iha Naktuka iha loron Domingo, 30 Novembru 2025.
Primeiru-Ministru observa katak, komunidade iha Naktuka ho maluk sira iha sorin ne’ebé baibain bolu malu maun-alin, bainhira konsege duni halo diálogu, ida-ne’e di’ak tebtebes nune’e ema ruma bá provoka atu halo fali buat ruma mós sira hatene ona katak komunidade rua ko’alia bá malu ona, ko’alia tuir lisan no kultura tanba ne’e lakohi halo tán problema.
Xefe Governu kontente no husu bo’ot bá rai-lulik, matebian sira hotu atu akompaña nune’e iha 10 Dezembru 2025 buat hotu la’o di’ak.
Xanana Gusmão fó atensaun bá komunidade iha Naktuka atu bainhira maun alin sira hosi parte Amfoang mak mai iha ne’e tenke simu sira ho di’ak, simu nu’udár maun ho alin, ko’alia bá malu, labele hirus malu, haku’ak-malu hodi rezolve lalais kestaun fronteira ne’e.
Iha fatin hanesan Jestór Sub Rejiaun Nitibe, Agustinho Afulit atualiza katak, planu bá diálogu komunitária nível fronteira entre Timor-Leste ho Indónezia espesialmente iha Suku Bene-ufe tuir loloos realiza iha tinan 2024 maibé la konsege no agradese tanba foin daudaun kolabora di’ak ho Prezidente Autoridade nune’e iha ona konkordánsia atu bele realiza iha loron 10 Dezembru 2025.
Tanba ne’e, aproveita oportunidade hodi informa bá Primeiru-Ministru atu bele fó orientasaun ruma, nune’e hamutuk ho Autoridade RAEOA bele hakle’an diskusaun tékniku bá sussesu diálogu ne’e.
