AMBENO (TOP) – Esforsu kamarada Arsenio Paixão Bano nu’udar atual Prezidente Autoridade ba Rejiaun Administrativa Espesial Oe-kusi Ambeno (RAEOA), durante ne’e halo serbisu maka’as atu halo partidu FRETILIN tenke manan iha nia rai-moris fatin, maibé ikus mai folin la’ek tebes basa nia suku rasik mós FRETILIN kontinua simu derrota hanesan iha eleisaun prezidensial ronde dahuluk no daruak.
Fulan ida molok atu tama ba loron votasaun ba eleisaun parlamentar, Bano ho nia kamarada sira seluk halo rekrutamentu derepende ba joven sira iha Ambeno kuaze 2300 resin ba programa “Ami Prontu Serbisu” ne’ebé depois koloka ema hirak ne’e balun ba iha sede aldeia, suku no hamoos merkadu balun iha teritoriu Ambeno.
Maibé, atu pasa iha serbisu ne’e, Bano ho nia kamarada sira ezije ba joven hirak ne’e tenke tidin hotu kedas Bandeira partidu FRETILIN iha ida-idak nia uma oin, no tenke buka tan ema nain-lima hodi vota ba FRETILIN mak bele hetan serbisu ne’e, no kontratu ba serbisu ne’e tuir planu sei hahu iha Juñu tinan ida ne’e.
Se plata forma mak manan duni eleisaun ne’e, sei iha duni kontratu ba joven hirak ne’e, maibé se partidu seluk mak manan, entaun joven sira ne’e sei fila ba ida-idak nia fatin hanesan baibain.
The Oe-Kusi Post (TOP) observa, kampaña eleitoral partidu FRETILIN iha RAEOA, Arsenio Paixão Bano promete, bainhira FRETILIN manan, nia kamarada Sekretariu Jeral Partidu FRETILIN, Mari Bim Amude Alkatiri mak sei sai nu’udar Primeiru-Ministru iha governasaun foun tuir mai.
“Ha’u garantia katak, partidu FRETILIN sei manan maioria iha Pante Makasar, tanba autoridade RAEOA halo rekrutamentu ba membru Ami Prontu Serbisu hamutuk 2300, no mós kria koperativu ho naran Soba-Ato iha suku 18,” Bano promete durante kampaña FRETILIN iha Ambeno foin lalais.
Maibé, realidade hatudu, iha aldeia Sanane, suku Costa ne’ebé nu’udar Bano nia rai moris fatin ne’e iha sentru votasaun hamutuk tolu mak hanesan, sentru votasaun EBC Palaban, rezultadu provizoriu hatudu CNRT hetan votu validu hamutuk 307, no FRETILIN hetan de’it votu 121.
Iha fali sentru votasaun Cosano Santo António Oe-Kusi Ambeno, rezultadu provizoriu hatudu CNRT hetan votu validu hamutuk 796, FRETILIN hetan 708.
Iha sentro votasaun EBF Masin, rezultadu provizoriu hatudu CNRT hetan votu validu hamutuk 910, no FRETILIN hetan de’it 486.
Rezultadu provizoriu iha sentru votasaun EBC Santo António, FRETILIN mak hetan votu barak liu kompara ho CNRT. FRETILIN hetan votu 706, no CNRT hetan de’it 537.
Rezultadu provizoriu husi sentru votasaun tolu ne’e hatudu, CNRT mak hetan votu barak liu kompara ho FRETILIN. CNRT hetan votu validu hamutuk 2550, no FRETILIN hetan de’it 2112.
Oe-Kusi Ambeno kompostu husi sentru votasaun hamutuk 80, no rezultadu provizoriu husi sentru votasaun hirak ne'e hatudu partidu CNRT mak hetan votu validu barak liu hamutuk rihun 19 resin, no partidu FRETILIN hetan rihun 15 resin.
