PASSABE (TOP) – Prezidente Partidu CNRT, Kay Rala Xanana Gusmão kontinua informa ba povu sira iha Sub-rejiaun Passae, Oe-Kusi Ambeno katak, durante ne’e Sekretariu Jeral Partidu FRETILIN, Mari Bim Amude Alkatiri sempre deklara iha fatin barak katak, governasaun Xanana ne’e nakonu ho korupsaun, no Xanana fila responde ba Alkatiri katak, iha governasaun dahuluk Alkatiri fa’an tiha riku-soin Timor, tanba deskonfia simu osan barak husi empreza petroliferu Australia nian.
Bainhira Xanana hala’o asaun karitativa ba familia vulnerabel sira iha rai-laran iha tinan 2020 to’o 2021, Alkatiri akuza nia katak, lori osan na’ok mak sosa hahan hodi fahe ba povu sira ne’e maske realidade hatudu hahan hirak ne’e mai husi Timoroan sira ne’ebé iha laran luak hodi ajuda familia kbi’it la’ek sira.
“Mari o keta haluha, o fa’an tiha riku-soin Timor nian simu osan husi kompañia Australia ninian,” hateten Xanana durante hala’o mini-kampaña CNRT nian iha Sub-rejiaun Passabe, Oe-Kusi Ambeno, Sábadu 13 Maiu 2023.
Notisia relevante: Kazu subornu: se Alkatiri maka manan Xanana prontu tama prijaun
Xanana esplika, korupsaun ida boot liu iha Timor mak sosa ro HAKSOLOK ne’ebé Alkatiri halo ona pagamentu 100% iha tinan 2017, maibé to’o ohin loron ro HAKSOLOK ne’e seidauk mai Timor-Leste.
Xanana mós esplika ba militante no simpatizante CNRT nian iha Passabe katak, kondisaun estrada husi Tono ba to’o Passabe ne’ebé nia kondisaun a’at tebes to’o ohin loron, tanba mosu korupsaun ida boot tebes durante Alkatiri sai mandor ba projetu pilotu ZEESM iha Oe-Kusi Ambeno.
“Tanba ne’e ita tenke halo investigasaun ba osan millaun barak ne’ebé lakon iha Ambeno ne’e. Ita lalika tauk. Osan ne’ebé sira gasta la halo buat ida. Estrada husi Tono mai Passabe a’at tebes,” Xanana afirma.
“Iha Oe-Kusi Ambeno, Alkatiri nia mane-foun sosa USB ida ho folin US$ 450. Ita ba sosa iha loja sira nia folin loloos mak entre US$ 2.50 centavos ka US$ 3. Ida ne’e na’ok imi nia osan. Tanba ne’e mak sei muda lei RAEOA no ZEESM ne’e”.
Kona-ba kazu akuzasaun suborn, Alkatiri antes ne’e hato’o ona keixa bai ha Ministériu Públiku hodi prosesa bankada CNRT inklui Prezidente Partidu CNRT, Kay Rala Xanana Gusmão, maibé to’o oras loron kazu ne’e seidauk lori ba to’o Tribunal hodi hahu halo prosesu julgamentu.
