NUNU-HENU (TOP) – Lider Istoriku, Kay Rala Xanana Gusmão tun direita ba terrenu hodi observa uma komunidade no simuteriu jerál ne’ebé mota sobu iha Aldeia Nunu-Henu, Suku Cunha, sub-rejiaun Pante Makassar iha Rejiaun Administrativu Espesiál Oe-Kusi Ambeno (RAEOA).
Udan boot ne’ebé akontese durante loron 24 Dezembru 2022 kalan halo mota Tono konsege sobu uma komunidade nian kuaze 10 hamutuk ho Uma Lulik Nunu-Henu no rate lubuk ida iha simuteriu públiku ne’e mós hetan estragus.
Komunidade Aldeia Nunu-Henu, Suku Cunha, Olinda Maria Ribeiro da Cruz konta udan loron tomak iha loron 24 Dezembru 2022 lori tristeza boot ba sira, tanba preparasaun povu atu ba misa natál simu Na’i Jesus Kristu nia moris hias nakfilak sai tristeza ba sira.
“Udan kuaze loron tomak iha 24 Dezembru too kalan boot mota Tono tun-naresin mai sobu tiha bronjong kontinua mai sobu ami nia uma to’o rate sira iha simitériu laran mós mota sobu hotu,” Olinda Maria hateten durante simu vizita Xanana bainhira halo observasaun iha fatin ne’e iha loron Sesta 13 Janeiru 2023.
Komunidade sira iha aldeia Nunu-Henu, suku Cunha, sub-rejiaun Pante Makassar dada-lia hela ho lider karismatiku Kay Rala Xanana Gusmão kona-ba sira nia moris lor-loron durante ne’e no kona-ba mós dezastre inundasaun ne’ebé sobu tiha sira nia rate no natar hektar lubuk ida. Foto TOP/Raimundos Oki.
Nia dehan, depois akontesimentu, sira nia parte konsege hetan apoiu umanitaria hanesan foos, mina no aihan seluk tan hosi ekipa Apoiu Umanitariu Maun Boot Kay Rala Xanana Gusmão ho Kruz Vermelha Timor-Leste (CVTL).
“Ami foin simu apoiu hosi maun boot Xanana ho Kruz Vermelha, maibé autoridade RAEOA to’o agora seidauk fó apoiu ruma no seidauk koloka ekipamentu ruma atu mai normaliza mota dalan,” nia preokupa.
Iha fatin hanesan, Xefe Suku, Cunha, Domingos Seco Caunan preokupa inundasaun ba dala rua ona, primeiru iha loron 4 Abril 2021 no agora akontese tan, maibé autoridade RAEOA seidauk fó apoiu ruma ba vitima sira.
“Mota mai sobu dala rua ona, maibé too agora autoridade RAEOA mai promote atu hadia no harii fali uma komunidade nian no dehan atu lori apoiu mai, maibé too agora sira la mai,” nia preokupa.
Nia dehan, importante liu maka autoridade RAEOA presiza koloka ekipamentu pejadu atu normaliza uluk mota dalan hodi evita mota labele kontinua sobu hela fatin komunidade no natar.
Uma ida ne'e hetan dezastre dala rua ona iha tinan 2021 no 2022, maibé to'o oras ne'e seidauk hetan apoiu ruma husi governu rejional RAEOA. Foto TOP/Raimundos Oki.
Entretantu, Lider Istoriku, Xanana dehan, nia parte sei buka koordena ho emprezariu Ambeno-oan sira atu apoiu ekipamentu pezadu buka rezolve problema ne’ebé komunidade sira enfrenta, liu-liu normaliza hikas mota dalan atu satan bee mota labele sobu uma komunidade sira nian.
“Ha’u sei ko’alia ho ita nia setór privadu Oe-Kusi-oan oan para normaliza de’it mota dalan,” katak Xanana.
Durante vizita, Kay Rala Xanana Gusmão hamutuk ho komunidade sira hala’o mós serimónia rituál agradesimentu no husu lisensa ba naturaza atu labele sobu bebeik uma komunidade sira nian.
Hafoin serimónia ritual, Xanana kontinua hala’o dialogu ho komunidade sira hodi rona sira nia preokupasaun no esplika preparasaun partidu CNRT hodi hasoru eleisaun parlamentar mai, CNRT tenki manan absoluta iha Oe-Kusi Ambeno no munisipiu seluk tan hodi ka’er ukun hadia problema nasaun nian, no hasai tiha ema laran-makerek no laran a’at sira iha Ambeno.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
