BI-HALA (TOP) – Lider Istóriku, Kay Rala Xanana Gusmão akompaña husi Padre Parokia Padiae, Carlos de Dedus no sarani sira ofisialmente inagura ona kapela São Fransisco Xavier de Bi-Hala iha aldeia Bi-Hala, suku Bobokase, sub-rejiaun Pante Makssar, Oe-Kusi Ambeno.
Kontrusaun Kapela São Fransisco Xavier de Bi-Hala hetan apoiu fundus husi Kay Rala Xanana Gusmão no konstrui husi Kompañia Kefi Oel lideradu, Fernando Manat hahú tinan 2021 no hetan ona bensaun husi Don Virgilio Cardéal do Carmo da Silva, SDB iha loron 19 Novembru 2022.
Padre Paroku Padiae, Carlos de Dedus hamutuk ho sarani sira hato’o agradese ba apoiu husi Xanana nu’udar grasa di’ak ida husi Na’i Maromak hodi oferese ba sarani sira bele utiliza hodi hametin sira nia fiar nu’udar Katolika.
“Sarani sira ita kontente no agradese ho haksolok, Avo Xanana hetan bensaun husi Na’i Maromak hodi apoia ita harii kapela furak ida ne’e, ita nia Kardéal Don Virgilio Cardéal do Carmo da Silva, SDB iha loron 19 Novembru 2022 mai fó ona bensaun, ohin ita hamutuk hodi mai inagura ho misa agradesimentu hamutuk ho Avo Nana ho nia ekipa tomak,” Padre Carlos agradese durante misa.
Padre hatutan, sarani no Igreja Oe-Kusi Ambeno selu labele, maibé sira sei hasa’e de’it orasaun ba sakrifisiu no domin hotu husi Xanana nian, so Na’i Maromak deit mak bele selu liu husi orasaun sarani sira nian.
“Ami so reza deit ba Na’i Maromak atu haraik bensaun saúde di’ak ba Avó iha nia atividade hotu, hodi tau matan ba ami no povu tomak,” padre agradese.
Iha fatin hanesan, Eis Primeiru Ministru Xanana Gusmão dehan, apoiu nu’udar grasa no esperitu Santo liu husi ninia apoiu ne’ebé oferese mós ba fatin seluk iha Timor-Leste.
“Apoiu ne’e hanesan esperitu Santo ne’ebé oferese liu husi atan oan ha’u ne’e. Ita fiar duni ba Na’I Maromak, ha’u apela ba joven sira atu mai reza hamutuk ho ferik no katuas sira,” katak Xanana.
Xanana konsiente katak, measke la hola parte iha kargu ofisial ruma, maibé nu’udar Timoran sempre lolon liman apoia harii kapela tuir ninia kbiit.
Eis Prezidente Repúblika ne’e hatutan, foin lalais nia vizita ba Vaticano Roma hasoru malu ho Papa Fransisco hodi hato’o mensajen oinsa mak habelar domin ka Fraternidade Umana nu’udar Katolika oan.
“Ha’u foin lalais hasoru Papa Fransisco dehan, apoiu ema seluk tuir ita nia kbiit no lalika hanoin boboot, apoiu hanesan ne’e mós ita agradese ba Maromak nia tulun,” nia hateten.
Iha oportunidade ne’e, Xanana alerta ba juventude sira hado'ok 'aan husi arte marsiál hodi kari domin no kuda dame hahú husi Oe-Kusi Ambeno ba Timor tomak.
