AMBENO (TOP) – Prezidente Autoridade ba Rejiaun Administrativu Espesial Oe-Kusi Ambeno (RAEOA) Arsenio Paixão Bano promete ona atu halo estrada sira iha rai-ketan Oe-Kusi Ambeno hahu semana oin to’o fulan oin.
Eis deputadu FRETILIN ne’ebé Prezidente Partidu Libertasaun Popular Taur Matan Ruak sarani nia nu’udar “buan” ida ne’e esplika, estrada husi ponte Noe Fefan iha suku Lifau ba to’o Citrana iha suku Bene-Ufe, sub-rejional Nitibe sei hahu iha fulan oin, no estrada husi diresaun Tono ba to’o diresaun sub-rejiaun Oe-Silo sei hahu iha semana oin.
“Ha’u hakarak hatete ba imi katak estrada husi ponte Noe-Fefan, Oe-Nunu ba to’o Citrana fulan ida ne’e hahu ona,” Bano promete ba lider komunitariu sira bainhira partisipa iha komemorasaun loron kriasaun ZEESM ba dala 8 iha salaun hotel Fitun-Lima iha Oel-Upun, Oe-Kusi Ambeno, Sabadu 18 Juñu 2022.
Nia hatutan, estudu viabilidade ba projetu estrada hirak ne’e halo hotu ona iha mandatu Mari Bin Amude Alkatiri nian, maibé semana oin no fulan oin mak foin hahu halo projetu estrada sira ne’e.
“Semana ida ka semana rua tan ita halo ona tenderizasaun ba estrada husi Tono ba suku Bobokase to’o Oe-Silo, serbisu sei barak. Ha’u husu ita hotu iha ne’e, ema barak sei mai serbisu, osan barak sei sirkula,” Bano promete.
Bano justifika nia mandatu durante tinan rua ikus ne’e labele halo buat barak, tanba moras surtu Covid-19 mak halo nia bo’ok aan la di’ak iha Oe-Kusi Ambeno, maibé nia dehan konsege rezolve ona problema bee moos iha rai-ketan ne’e.
“Problema prinsipal iha Oe-Kusi Ambeno mak problema bee moos, tanba tinan ida ne’e autoridade rezolve ona bee moos ba komunidade hamutuk 85.000 iha suku 18,” Bano esplika, maibé komunidade sira iha Oe-Kusi villa liliu iha área Palaban ba to’o Lifau to’o oras ne’e sei kontinua hakilar kona-ba problema bee moos.
Bano mós durante ne'e sempre dehan osan sira ne'ebé atu uja hodi halo estrada sira iha Ambeno ne'e segredu.
