Tribunal bandu ona sósiu JU,S Bárbara Oliveira labele akompaña vitima pedofilia iha julgamentu

DILI (TOP) – Tuir informasaun balun ne’ebé The Oe-Kusi Post (TOP) asesu, Tribunal Distrital Oe-Kusi Ambeno bandu ona sósiu Jurídico Social Consultoria, Lda (JU,S), Bárbara Oliveira atu labele tama akompaña vitima ba kazu pedofilia durante prosesu julgamentu la’o iha Tribunal laran no, bandu mós labele tama iha resintu Tribunal nian hafoin mosu problema ameasa entre arguido eis padre RD ho sósiu JU,S, Bárbara Oliveira.

Antes ne’e parte advogadu ba arguidu eis padre RD hatama tiha ona pedidiu ba Tribunal hodi labele permite Bárbara Oliveira husi JU,S atu tama akompaña prosesu julgamentu ba kazu ne’e, tanba legalmente vitima ba kazu pedofilia sira ne’e reprezenta no akompaña ona husi Ministériu Públiku nu’udar nain ba asaun penal. Ministériu Públiku maka iha mandatu legal hodi reprezenta vitima sira, durante prosesu julgamentu ba kazu ne’e iha Tribunal, la’os JU,S maka atu reprezenta fali.

“Ha’u rona ohin advogadu husi parte arguidu nian follow up tan pedidu uluk nian kona-ba labele permite advogadu husi JU,S nian tama iha Tribunal, no ikus mai Tribunal desidi bandu ona ema sira husi JU,S katak Tribunal bandu ona sira atu labele tam aba Tribunal laran durante prosesu julgamentu la’o, no bandu mós sira labele tama iha áreador Tribunal nian,” hateten fonte konfirmadu ida via kontaktu telemovél ba TOP, Kuarta 14 Jullu 2021.

Fonte ne’e esplika, juiz maka sei tesi-lia kona-ba kazu ne’e, Prokurador ka Ministériu Públiku makai ha mandatu legal hodi reprezenta vitima pedofilia sira iha prosesu julgamentu. JU,S laiha mandatu legal atu reprezenta vitima sira durante prosesu julgamentu. JU,S bele observa de’it husi liur, observa iha estrada ne’eba, maibé nia laiha mandatu legal hodi tama tur iha sala julgamentu, tanba nain ba asaun penal maka Ministériu Públiku.

“Se JU,S maka nu’udar advogadu ba arguidu ka nu’udar Ministériu Públiku karik sira iha mandatu legal hodi tama tuir julgamentu, maibé JU,S nu’udar konsultor juridiku ida ne’ebé laiha dalan legal atu tama defende vitima pedofilia sira iha Tribunal, maibé agradese ba Tribunal, tanba bandu tiha ona sira hodi labele tama iha sala laran durante prosesu julgamentu la’o” fonte ne’e afirma.

Fonte ne'e mós hatutan, Tribunal bandu de'it Bárbara Oliveira, maibé membru JU,S sira seluk Tribunal la bandu ida.

Entretantu, tuir kronolojia ameasa ne’ebé TOP asesu husi pájina ofisial Facebook JU,S nian katak, iha loron Tersa 13 Jullu 2021 iha oras tuku 11 liu minutu 15, arguidu eis padre RD halo ameasa ba sósiu JU,S Jurídico Social, Bárbara Oliveira iha Tribunal Distrital Oe-Kusi Ambeno. Hafoin hetan ameasa ne’e, Bárbara Oliveira mós keixa ona arguidu eis padre RD ba polisia iha Oe-Kusi Ambeno.

Ho kazu ne’e, tuir informasaun ne’ebé TOP asesu, Tribunal Distrital Oe-Kusi Ambeno mós foti ona desijaun hodi bandu Bárbara Oliveira atu labele tama tuir prosesu julgamentu ba kazu ne’e tuir pedidu husi arguidu eis padre RD nian, tanba Ministériu Públiku makai ha mandatu legal hodi defende vitima pedofilia sira iha Tribunal, la’os JU,S.

JU,S oras ne’e halo advokasia maka’as ba labarik feto nain 14 ne’ebé dehan sai vitima ba kazu violasaun sexual ne’ebé akontese iha uma mahon Topu-Honis iha Oe-Kusi Ambeno, maibé haluhan tiha hodi taka tiha matan-ibun ba labarik feto sira ho idade menor besik nain 30 sai vitima detensaun no vitima visum obrigatoriu iha uma mahon Pradet Oe-Kusi Ambeno iha tinan 2020.  

Notisia relevante: Vitima visum obrigatoriu keixa ona ema nain 12 iha Ambeno

Antes ne’e mós lider karismátiku, Kay Rala Xanana Gusmão husu ba juiz sira iha Tribunal Distrital Oe-Kusi Ambeno hodi tetu didi’ak kazu ne’e, tanba Xanana konsidera evidensia sira ne’ebé aprezenta husi ONG sira no Ministériu Públiku hodi kondena eis padre RD ba kazu pedofilia ne’e nakonu ho iregularidade, illegal no immoral, tanba halo detensaun no halo visum obrigatoriu ba labarik feto sira ho idade menor kuaje nain 30 hodi buka evidensia atu kondena eis padre ne’e.

Xanana konsidera maneira halibur evidensia sira hanesan ne’e viola Kodigu Prosesu Penal iha artigu 110 kona-ba proibisaun ba prova sira.

Notisia relevante: Xanana provas prokurador ho ONG sira ba kazu Topu-Honis ne’e immoral no iregularidade

Iha mós vitima detensaun no vitima visum obrigatoriu balun ko’alia sai tiha on aba públiku katak sira besik nain 30 ne’e nunka hetan violasaun sexual husi eis padre RD, maibé durante prosesu inkeritu iha Prokuradoria Ditrital Oe-Kusi Ambeno hetan ameasa oioin hodi tenke deklara katak, sira hetan duni violasaun sexual, se la deklara hanesan ne’e bele hetan pena prijaun tinan tolu, no balun bele muda tiha sir aba fatin seluk iha teritoriu nasionál.

Notisia relevante: Matilda Coa: durante tinan 17 iha Topu-Honis amo nunka ka’er ha’u nia isin

Ho maneira ameasa hanesan ne’e ikus mai labarik feto ki’ik balun tenke hatan katak, eis padre RD halo duni violasaun sexual ho nia, mas nia hato’o deklarasaun ne’e ho kondisaun ameasa.

Notisia relevante: Ami sente ami nia fatin-lulik moras to’o mii-ran

Nune’e, labarik feto nain 5 ne’ebé antes ne’e Ministériu Públiku arola (rejista) nu’udar vitima ba kazu pedofilia, maibé ikus mai rejeita total akuzasaun Ministériu Públiku nian.

Notisia relevante: Vitima “forsada no falsu” ba-kazu pedofilia presta ona deklarasaun iha Tribunal Ambeno

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE

Online Counter