MANUFAHI (TOP) – Iha tinan 2020, kompañia lokal Daloveya Unipesoal, Lda manan kontratu ida husi Ministériu Saúde atu harii fatin izolamentu ida iha Bubur-Laran, Same, Manufahi ho nia durasaun konstrusaun fulan tolu tenke remata ona, maibé to’o oras ne’e seidauk remata, no a’at liutan foin maka to’o pursentu 30.
Tuir monitorizasaun husi Rede Monitorizasaun Dezenvolvimentu (RMD) katak projetu ne’e la’o atraja, tanba la finaliza tuir kontratu serbisu ne’ebé fó sai iha kuadru avizu ne’e.
Kontratu ba projetu izolamentu ho númeru kontratu RDTL-MS-DNA-DC-20-256 ne’e ho valor osan hamutuk dollar Amérikanu rihun atus tolu, tolu-núlu resin sía atus úalu rua-nulu resin-úalu pontu úalu-nulu resin-úalu ($ 339,828.88) finaliza tarde hodi salva sidadaun sira husi Covid-19.
Visé kordenadór RMD munisípiu Manufahi, Isaac da Costa Sarmento foin lalais, ba halo inpeksaun ba kontruksaun fatin izólamentu iha bubur laran katak, governu la sériu atu kombate Covid-19 iha munisípiu Manufahi, tanba kontruksaun fatin izólamentu ne’e tuir kontratu prosesu konstruksaun durante fulan 3 nia laran tenki finaliza ona maibé, to’o ohin loron kontruksaun foin atínji pursentu 30.
“Loloos projetu ne’e emerjénsia tenki finaliza tuir kontratu, no labele konsidera hanesan projetu normál,” katak Visé kordenadór RMD munisípiu Manufahi, Isaac da Costa Sarmento ba jornalista sira iha Manufahi, Sesta 21 Maiu 2021 ne’ebé The Oe-Kusi Post (TOP) sita husi News "Roman Ba Sosiedade" ARS.
RMD mós lamenta iha prosesu kontruksaun ne’e, la iha kontrólu másimu husi ajénte projetu munisípiu nian, hodi fó impaktu ba prosesu kontruksaun finaliza tarde, tanba ne’e sujere ba governu atu aselera lalais kontruksaun fatin izólamentu ne’e, hodi kombate covid-19 ne’ebé ameasa sidadaun sira nia vida iha munisípiu ne’e.
Iha fatin hanesan menejer projetu kompaña Daloveya Unipesoál Lda. Majorico Ceke tali rekueñese katak, tuir kontratu projetu ne’e implementa durante fulan 3 nia laran tenki finalize, maibé finaliza tarde tanba hafoin asina kontratu durante fulan ida nia laran la implementa projestu ne’e, tanba governu seidauk defíni loloos kona ba rai ne’ebé atu halo kontruksaun, entau fó tempu ba governu atu halo diskusaun kona ba rai, depois iha prosesu kontruksaun mosu tan mudansa husi governu tanba hamosu tan item balun kona ba kontruksaun nian, entau kompaña husu tempu adisionál iha mudansa ba dezeñu kontruksaun nian, iha prosesu kontruksaun la’o mosu tan serka sanitáriu inklui mosu inundasaun boot iha Dili hodi prejudika ba distribuisaun material kontruksaun husi Dili mai Same.
Jestor projetu ne’e informa katak, kontruksaun projestu ne’e atinji ona porsentu 30 no kompaña promete fulan rua nia laran sei finaliza projetu ne’e. kontruksaun fatin izólamentu ne’e ho medida luan metru 14,4, naruk metro 23,4, sala baixa iha 6 sei akumula kama 25 inklui sala ba médiku sira.
Entretantu jornalista sira konfirmaa asuntu ne’e, ho diretora serbisu saúde munisípiu Manufahi Florençia Corte-Reál Tilman segunda-feira (24/05) ohin, klarifika katak projetu ne'e halo tenderizasaun entre ministériu Saúde ho kompaña iha Dili, no implementa hahú iha fulan-Fevereiru tinan 2020.
Diretóra Florençia Corte-Reál Tilman konsidera konstrusaun ba fatin izólamentune'e atraza duni, tanba relasiona ho pandémia covid-19, no parte servisu saúde nafatin halo kontrolu ba projetu ne'e, no parte kompaña rasik sei esforsu atu finaliza iha tempu badak. (JÚGU)
