DILI (TOP) — Prosesu buka tuir ema nain-rua ne’ebé hetan asidente ho bero husi Dili ba Atauro iha loron Sábadu 14 Maiu liuba, to’o oras ne’e seidauk hetan maibé, parte familia desidi hodi hapara de’it ona prosesu buka tuir basa tuir lisan familia nian katak, bainhira mout lakon semana rua ona, ne’e lakon duni ona iha tasi laran.
Administradór Postu Administrativu Atauro, munisipiu Dili, Mateus Belo katak, durante loron hitu (7) ona sira kontinua buka tuir ema nain-rua ne’ebé seidauk hetan maka Fransisco Lopes no Nour Soares maibé, to’o oras ne’e seidauk hetan, no parte familia mós desidi ona hodi hapara prosesu buka tuir ema nain-rua ne’e.
“Família maka deside hapara buka tuir tanba tuir kultura povu Atauro nian katak ema ne’ebé mate (mout) liu ona semana ida, ne’e katak lakon ona ba tasi laran,” katak Administrador Mateus Belo ba jornalista sira via kontaktu telemovel, Tersa 25 Maiu 2021.
Nia hatutan, familia matebian hosi vitima dezatre ró Adewa-01 koordena ho Unidade Polisia Maritima (UPM) Forsa Navál FALINTIL Forsa Defeza Timor-Leste (F-FDTL) hapara ona prosesu buka tuir mate isin vitima Nour Soares (18) no Fransisco Lopes ne’ebé mout iha loron Sábadu 14 Maiu liuba.
Nia esplika, normalmente tuir predisaun povu Atauro ne’ebé moris no fiar ba natureza no kultura tasi katak, bainhira ema ida mate iha tasi laran, nia isin loloos bele namlele iha tasi leten ho durasaun tempu loron ha’at de’it, no liu ona loron hitu, mate isin bele mout fali ba tasi laran.
“Hahu kedas iha loron Sábadu 14 Maiu liuba to’o agora familia, komunidade Atauro koopera ho ita nia polisia maritima no forsa naval halo esforsu buka tuir mate isin la hetan, tanba ne’e familia deside hapara buka, tanba normalmete bainhira mate isin ida mout iha tasi laran ho tempu loron haat mate isin sei namlele iha tasi leten, maibé liu ona loron hitu mate isin bele mout ona ba tasi laran, tanba ne’e familia deside hapara buka mate isin,” nia afirma.
Nia dehan, hafoin hapara buka mate isin, familia sira mós halo kedas serimónia ritual hanesan bolu hikas matebian na’in rua nia klamar hodi foti fatuk tau ba rate nu’udar simblu reprezenta matebian na’in rua nia illas hodi hala’o kedas serimónia funebre iha simitériu Ataúro nian.
“Depois deside hapara serimónia buka mate isin iha loron Sesta 21-23 Maiu, familia sira hala’o serimónia funeral simboliku hodi lori ai-funan no lilin ba tau iha tasi no simitériu,” nia esplika.
Matebian Fransisco Lopes orijin husi Suku Welaluhu, Munisipu Manufahi durante tinan barak moris iha Aturo no kaben ho Sanpira Soares no sira iha oan na’in lima, feto rua mane tolu.
Entretantu, matebian Naol Soares tinan 18 husi suku Beloi, Atauro nu’udar familia no rian husi matebian Fransisco Lopes nian.
Antes ne’e, komandante Unidade Polisia Maritima (UPM), Superintendente Asistente, Basilio de Jesus rekoñese laloran tasi makas afeita mós ba forsa konjunta hodi buka tuir mate isin.
Komandu UPM rasik too agora seidauk bele autoriza abitante Ataúro halo movimentu ba mai, tanba laloran tasi sei kontinua boot.
