JAKARTA (TOP) – Delegasaun Prezidente Repúblika José Manuel Ramos-Horta sai husi aereoportu internasional Prezidente Nicolau Lobato Komoro-Dili ho aviaun CITILINK iha loron Segunda 18 Juñu 2022 oras tuku 13:40 otl, no to’o iha aeroportu internasional I Gusty Ngurah Rai iha oras tuku 14: 37, oras Bali simu direta husi embaixador Timor -Leste ba Indonéziai, Aleixo da Silva.
Durante iha Bali, Xefe Estadu ho ekipa kontinua viazen ba deskansa iha Ótel Patra Bali kuaze oras lima resin, no to’o iha oras 19:50 foin kontinua viazen husi Bali to’o aeroportu internasional Soekarno Hatta iha oras tuku 21:10, oras Jakarta nian.
Xefe Estadu ho ekipa to’o iha salaun VVIP Jakarta simu direita husi Ministru Obras Públika Indonezia, Basuki Hadimuljono ho parede militár nu’udar onra no orgullu simu vizita espesiál ne’e.
Vizita Xefe Estadu ne’e hodi hala’o enkontru ho Prezidente Republika Indonezia, Joko Widodo hodi deskute no hametin lasu kooperasaun bilaterál entre rai rua ba futuru.
Tuir ajenda, tersa feira 19 julhu 2022 ohin, Xefe Estadu sei hasoru malu ho nia amigu di’ak, Prezidente Indonezia, Joko Widodo no kontianua enkontru mós ho eis Prezidente Repúblika, Susilo Bambang Yudhono iha nia rezidensia.
Hafoin ida ne’e, iha oras 16:00, Prezidente sei hala’o enkontru ho Dirijente University of Indonesia (UI) hodi deskute kooperasaun iha setor edukasaun liu-liu kapasitasaun ba foin sa’e Timoroan sira. Depois Xefe Estadu sei hala’o mós vizita ba Plataran Restauran Menteng (Dinner Meeting) ho intelektual no jornalista senior sira husi Indonezia.
Iha loron kuarte –feira 20 Juñu oras tuku 09:00, Prezidente ho delegasaun sei hala’o enkontru ho Koordenador Organizasaun Islamiku Nahdila Ulama (Pengurus Besar Ulama) PBNU), No iha oras 11:00, PR sei vizita mós edifisiu ka Gedung Pusat Dakwa Muhammadiya.
Entretantu iha oras 13:00 Xefe Estadu sei vizita mós University of Islam Negri (UIN) no kontinua vizita kedas Edifisiu Media Kompas TV no Metro TV hodi hala’o entrevista ho Xefe Estadu kona-ba politika Timor-Leste iha áreahotu liga ho kooperasaun bilateral Timor-Leste no Indonezia no asuntu seluk tan kona-ba kooperasaun ba futuru entre nasaun membru ASEAN sira.
Prezidente Ramós Horta mós sei vizita Universidade Katolika Indonezia hodi hasoru malu ho lideransa sira.
Primeiru Vizita Servisu Prezidente Repúblika, José Ramós-Horta ba Jakarta Indonézia iha loron Segunda 18 Juñu, simu direita husi Ministru Obras Públika Indonézia, Basuki Hadimuljono akompaña husi Ministra Negósiu Estranjeiru no Kooperasaun (MNEK), Adalzija Magno inklui Ministru Agrikultura no Peskas Pedro Reis no Embaixador Timor-Leste ba Jakarta Indonezia.
Vizita Xefe Estadu ne’ebé akompaña husi Xefe Kaza Sivil, Bendito do Santos, Xefe Kaza Militar ho delegasaun asesor, no husi parte Governu nian mak Ministru Transporte no Komunikasaun José Agustinho no Ministru Turizmu Komérsiu Industri, José Lucas do Carmo.
Entretantu husi Parlamentu Nasionál nian reprezenta husi Deputadu Partidu Demokratiku (PD), Mariano Assanami Sabino, deputadu Partidu CNRT, Patrocino Fernandes, Bankada KHUNTO, Olinda Guterres, Bankada PLP, deputada Domingas Barreto no Bankada FRETILIN, deputada Nélia Menezes no setór privadu reprezenta husi Prezidente Câmara Comercio Industria Timor-Leste (CCI-TL), Oscar Lima.
Iha loron sesta-feira 22 julho 2022, Xefe Estadu sei hasoru malu mós ho ninia belun di’ak Embaixador Dino Djalal.
Hafoin vizita, PR Horta ho ekipa loron Sesta lokraik sei viazen ba Nusa Tenggara Timur-Kupang hodi hasoru malu ho Governador Kupang, Viktor Bungtilo Laiskodat
