JAKARTA (TOP) – Tuir ajenda Prezidente Repúblika José Manuel Ramos-Horta nian ne’ebé The Oe-Kusi Post (TOP) asesu, ohin Tersa 19 Jullu 2022 sei ba hasoru malu ho Prezidente Repúblika Indonézia Joko Widodo iha Palásiu Prezidensial iha Bogor, maibé Ministru Turizmu, Komérsiu no Indústria José Lucas do Carmo da Silva ho Xefe Kaza Militar labele akompaña, tanba rezultadu husi PCR (polymerase chain reaction) tests dekreta nain-rua ne’e pozitivu SARS Covid 2.
Delegesaun Presidente Repúblika José manuel Ramos-Horta ho total ema rua nolu resin kompostu husi, Xefe Casa Sivil, Militar, Ministru nain ha’at, deputadu sira husi bankada ha’at, setor privadu inklui jornalista iha viazen estadu hasoru malu ho Presidente Repúblika Indonésia Joko Widodo la dun la’o ho di’ak, tanba rezulta ema impotante rua mak labele partisipa, tanba pozitivu Covid 2.
Regra Estadu Repúblika Indonesia, sidadaun hirak ne’ebé atu asesu ba iha Palásis Prezidensial (Istana Negara) inklui Prezidente Repúblika José manuel Ramos-Horta rasik tenke submete ba teste Polymerase Chain Reaction (PCR). Nune’e delegasaun hotu ne’ebé to’o iha Hotel Indonésia Kepinsky tuku 22.05 oras Indonésia, hafoin deskansa no enkontru minutu balun submete kedas ba iha teste PCR ne’e.
Informasaun ne’ebé TOP asesu husi parte protokolu katak, iha nain rua mak deteta positivu nune’e labele akompaña PR Horta ba hasoru malu ho Prezidente Joko Widodo iha Palásiu Prezidensial iha Bogor.
Delegasaun rua ne’ebé pozitivu ba SARS Covid 2 mak Ministru Turizmu Komersiu Indústria, José Lucas do Carmo da Silva no Xefe Kaza Militar, Renilide Guterres Corte Real.
Tuir agenda, Ministru Turizmu Komersiu Indústria sei selebra akordu ho Ministru Turizmu Indonésisa ho sasin husi Xefe Estado nain rua. Maske labele partisipa, selebrasaun akordu kontinua la’o, reprezenta husi Ministra Negósiu Estranjeiru no Kooperasaun Adalzija Magno.
