DILI (TOP) – Samuel Sebastião Noronha Soares (27) desidi tara a’an iha Korea Sul hafoin remata ko’alia ho nia familia sira iha Dili.
“Ami nia oan foin ba iha dia 1 de April ne’e, No durante nia ba nia sempre halo kontaktu diak ho ami. Ami mós hakfodak tanba iha Domingu oras tuku 8 kalan nia sei ko’alia ho ami, hakfodak iha tuku 9 rona informasaun dehan ami nia-oan fila ona,” Jacinta Noronha nu’udar inan matebian Sebastião katak ba The Oe-Kusi Post (TOP) iha Beto Barat, Dili, Segunda 28 Juñu 2021.
Matebian Samuel Sebastião Noronha Soares oan husi Jacinta Noronha husi munisipiu Bobonaro, no Celestinho Soares husi munisipiu Ermera, antes ne’e serbisu ona iha Koarea Sul durante durante tinan lima ona, no fila mai Timor iha tinan hirak liuba.
Jacinta Noronha esplika, foin lalais kompañia ne’ebé nia serbisu kontaktu fali nia hodi ba kontinua fali serbisu iha fatin ne’ebé nia serbisu antes e aranka fali ba Korea iha loron 01 Abril 2021.
“Ami nia oan mane boot laiha moras no laiha problema ho ema. Informasaun ida agora akontese ne’e halo ami mós lakon esperansa boot no lakon buat hotu tanba lakon ona oan mane boot ida ne’ebé maka durante ne’e hare ami”.
Oras ne’e familia husu hela tulun ba governu atu oinsa bele transporta mate-isin ne’e mai Dili hodi halo’ot tuir sira nia lisan.
Entretantu, parte governu liu husi Sekretariu Estadu ba Formasaun Profisional no Empregu (SEPFOPE) mós hatene ona informasaun kona-ba kazu tara aan ne’e.
Diretór Empregu Exterior (DDE), SEPFOPE Filomeno Soares hateten, parte polisia Korea Sul nian hala’o tiha ona prosesu identifikasaun ba kazu tara aan ne’e.
“Horkalan ami simu informsaun husi adidu traballu iha Korea dehan katak alin mane oan ne’e tara aan, maibé polisia no forensik Korea sei halo prosesu identifikasaun,” katak diretor Filomeno.
