DILI (TOP) – Lider Istóriku, Kay Rala Xanana Gusmão kontinua orienta ekipa Sekretariadu Apoiu Atividade Maun Boot Kay Rala Xanana Gusmão hodi fó apoiu ai-han no sasán nesidade baziku ba povu afetadu ba dezastre iha Dili, Manatuto no Remexio-Aileu.
Iha loron Sabadu 01 Maiu 2021, ekipa fó apoiu ba vitima afetadu iha, Suku Mantelolão Postu Administrativu Metinaro, Dili kompostu hosi foos saka 200, supermie kaixa 20, mina kaixa 20 bikan 1 kaixa, kulusaun 10 pcs, sumasu 10 pcs no rinso kaixa 1 ne’ebé entrega direita hosi Sekretariadu Apoiu Atividade Maun Boot Kay Rala Xanana Gusmão, Tomás do Rosário Cabral autoridade suku hodi fahe direita ba vitima sira.
Iha tempu hanesan ekipa kontinua viazen ba fronteira Manatutu no Dili hodi entrega apoiu ropa no sapadu labarik no ema boot nian ba Madre Orfonatu sira iha Salaun-Soibada.
Iha Manatutu vila, ekipa kontinua entrega mós apoiu ba vitima sira iha Suku, Uma Caduka, Lacu Mesak, Uma Naruk, Hohorai no Laikere hanesan, ropa, sapatu no kulusaun, solar painel, no sasán nesidade baziku seluk tan.
Entretantu iha loron Domingu 02 Maiu 202,1kontinua lori mós apoiu foos, superimie, mina, no bee aqua hodi fó apoiu ba vitima inundasaun iha Aldeia Golgota, Suku Comoro Dili ho totál vitima 237 ne’ebé entrega direita ba Xefe Aldeia Golgota Agustinho de Sousa Pereira.
Xefe Aldeia Golgota Agustinho de Sousa Pereira hato’o agradese ba Lider Masimu, Kay Rala Xanana Gusmão ne’ebé kontinua tau matan ba povu iha tempu susar.
“Ami hato’o agradese ba apoiu ne’ebé Avo Nana fó hodi tulun vitima hamutuk 237 inklui mós estudante barak ne’ebé balun agora hahán menus ita sei fahe hotu ba sira,” katak Agostinho.
Iha fatin hanesan, Sekretariadu Apoiu Atividade Maun Boot Kay Rala Xanana Gusmão, Tomás do Rosário Cabral dehan, apoiu hosi Maun Boot Xanana bele tulun povu ultrapasa dezafiu ne’ebé sira hasoru.
“Ida ne’e apoiu hosi maun boot Xanana hodi bele tulun ita nia povu ne’ebé sai vitima iha inundasaun ne’ebé akontese,” dehan Tomás.
Nia dehan, mezmu Xanana la hola parte iha ezekutivu, maibé nu’udar lider kontinua mobiliza Timoroan sira iha rai laran no rai liur hodi buka apoiu povu sira ne’ebé sai vitima ba dezastre natural.
