DILI (TOP) – Primeiru-Ministru Kay Rala Xanana Gusmão fó ona orientasaun ba Ministériu Obras Publika (MOP), Instituto de Gestão de Equipamentos e Apoiu ao Desenvolvimento Infrastruturas, Instuto Público (IGEADI, I.P), no Ministériu Solidaridade Sosiál no Inkluzaun (MSSI) atu halo intervensaun direita ba estrada no ponte hirak ne’ebé kotu, inklui buka dalan salva populasaun husi risku dezastre naturál ne’ebé akontese, hafoin mosu udan bo’ot iha semana ida nia laran.
Xefe Governu husu atu ekipa MOP-IGEADI atu mobiliza ekipamentu pezadu tun direita ba área hirak ne’ebé sai risku hodi, suru-sai rai hirak ne’ebé monu taka estrada.
Ministru Obras Públika (MOP), Samuel Marçal katak, udan no anin maka’as akontese iha teritóriu Timor-Leste hodi rezulta estrada no ponte kiik balun kotu.
Eis Diretor Ajensia ba Dezenvolvimentu Nasionál (ADN) ne’e hateten, ekipa MOP-IGEADI desloka ona ba terenu, hodi halo levantamentu ba estragus hanesan, estrada iha Eralessu, Suku Molo, Postu Hatubuilico, Ainaro nian ponte ki’ik no estrada baluk kotu totál, no iha Suku Aituto Maubise rai-monu taka dalan.
“Dadaun ne’e Primeiru Ministru Xanana prepara ona programa governu nian, tanba ne’e mak fó ona orientasaun ba MOP-IGEADI no Ministériu Obras Publiku iha munisípiu sira atua hela situasaun, maibé seidauk bele halo asaun ruma, tanba hein udan been para tiha maka foin bele halo asaun, maibé ekipa prepara ona iha terenu hodi halo intervensaun para salva uluk vitima sira ne’ebé uma hetan estragus,” informa Ministru Samuel Marçal ba jornalista iha Palasiu Governu Dili, hafoin remata reniaun Konsellu Ministru, Tersa 4 Jullu 2023.
Nia hatutan, udan ho intensidade moderadu sei kontinua akontese, ne’e Xefe Governu orienta salva uluk populasaun nia moris.
“Tuir orientasaun primeiru ministru nian ekipa ba uluk iha terenu buka salva uluk vida populsaun nian husi risku ne’ebé lori dezastre no estragus oin-oin,” Samuel esplika.
Ekipa MOP-IGEADI identifika iha Ponta Leste, Lautem Ponte Api-Kuru ameasa kotu, tanba mota boot sobu moru protesaun kuaze hetan estragus.
Ekipa rekolla ona dadus iha estrada diresaun Lehulolo Aitutu Same ligasaun Ainaro mós ponte ki’ik ida kotu no estrada Holarua parte Tangue da Guterra ameasa kotu no dadaun ne’e governu lokál koordena ho Komandu PNTL no Bombeiru hodi halo intervensaun.
Iha Munisipiu Viqueuqe mós udan halo rai monu taka estrada públiku no ameasa estraga uma nian ne’ebé harii besik mota ninin.
Dezastre naturál ne’e afeita mós ba uma komunidade nian lubuk ida hetan estragus no ekipa governu liu husi MSSI dadaun rekolla hela dadus iha terenu hodi prepara ona kondisaun atu apoia vítima sira.
Dezastre natural ne’e mos rezulta estresidade monu iha Suku Casa, Postu Ainaro Vila hodi halo liña eletrisidade iha Postu Administrativu Maubissi, Hatubilico, Turiskai mate totál.
