DILI (TOP) — Nain ba asaun penal ka Ministériu Públiku ikus mai tenke rende ba osan nain ne’ebé prende iha aeroportu internasional Prezidente Nicolau Lobato Dili iha loron Tersa, 4 Outubru 2022, tanba la priense rekezitu krime brankamentu kapital (Money Laundry).
Advogadu privadu Partidu Kmanek Haburas Unidadade Nasionál Timor Oan (KHUNTO), Isamael Lopes hateten, Ministériu Públiku liu husi prokurador titular hatun ona despaixu ba Banku Central Timor-Leste (BCTL), hodi autoriza devolve (fó fali) osan hamutuk $130.000 husi partidu KHUNTO nian ne’ebé antes ne’e parte autoridade seguransa no Autoridade Aduaneira (AA)/Alfandega halo apreensaun iha Aeroportu Internasional Prezidente Nicolau Lobato iha loron Tersa, 4 Outubru 2022, tanba la priense rekezitu krime brakamentu kapital.
Advogadu ne’e hatutan, hafoin Ministériu Públiku (MP) rona tiha parte hirak ne’ebé sai hanesan sasin ba prosesu liu-liu ba ema hirak ne’ebé sai hanesan suspeitu ba kazu lori osan ho montante $130.000, Ministériu Públiku nu’udar na’in ba asaun penal tuir lei Kodigu Penal 49, nia mak bele halo promosaun no halo akuzasaun.
Maske Nunee, MP hafoin valida tiha prosesu osan $130.000 no rona tiha suspeitu ne’ebé lori osan ne’e nian deklarasaun.
“Ministériu Públiku haree no entende katak ba prosesu osan $130.000 ne’e la prense rekezitu ba krime brankamentu kapital,” advogadu privadu Isamail Lopes hateten liu husi konferensia ba imprensa iha Hotel-Timor, Dili, Kinta 19 Janeiru 2023.
Advogadu Ismael haktuir, osan hirak ne’e nu’udar osan partidu KHUNTO nian hasai husi banku atu lori ba halo kompras ba atributu partidu nian, hodi prepara ba atividade partidu nian iha eleisaun parlameta tinan 2023. Maibé, osan refere kosidera, osan ne’ebé ema nain-rua ne’e la hetan koñesimentu husi Banku Central Timor-Leste (BCTL), no viola lei brankamentu kapital. Tanba lori osan ho montante boot la informa ba BCTL.
“Ministériu Públiku nu’udar nain ba asaun penal hafoin valida tiha prosesu osan 130.000, nune’e Ministériu Públiku haree no entende katak ba prosesu osan ne’e la priense rekezitu krime brankamentu kapital,” advogadu ne’e esplika.
Tanba la priense rekezitu krime, ikus mai Ministériu Públiku husu ba BCTL hodi transfere hikas osan sira ne’e ba iha partidu KHUNTO nia konta bankaria, no selu de’it koima hamutuk U$ 725, tanba viola de’it regra administrativa husi lei numeru 11/2017 importasaun no exportasaun.
