DILI (TOP) — Reprezenta negosiante dudu karosa pentolan, António Ena hateten, implementasaun serka sanitaria iha kapital Dili, haterus tebes sira durante ne’e, tanba lahetan rendimentu.
Ena hatutan, negosiante dudu karosa pentolan hamutuk na’in 14 iha bairu Kampung Baru, aldeia 4 Setembru, suku Komoro, Postu Administrativu Dom-Aleixo, Munisipiu Dili durante ne’e ladun hetan rendimentu maka’as hodi sustenta sira nia nesesidade báziku, tanba hafoin implementasaun serka sanitáriu ne’e laiha ema maka sosa sira nia sasan.
“Bandu ami labele sai hodi faan pentolan ba bairo sira iha Dili laran, kuandu ami la faan hanesan ne’e, ami la hetan osan no ami nia osan mós laiha atu selu ba kos no ami halo saida loos, susar tebes baa mi negosiante ki’ik sira,” hateten Ena ba ba jornalista sira iha Kampung Baru, Komoro, Dili, Kuarta 17 Marsu 2021.
Nia konta, situasaun normal hanesan babain faa’n pentolan iha Dili laran badinas lori karosa pentolan faan tama-sai bairu sira iha Dili laran, no loron id abele hetan $10, maibé ddesde Dili tama iha situasaun serka sanitaria susar tebes atu hetan osan.
“Ami osan laiha ona atu sosa hahan hodi han,” Ena afirma.
Implementasaun serka sanitaria ne’e mós bandu rezidente sira iha kapital Dili labele sai ba munisipiu seluk, no bandu mós movimentu transporte maritima hanesan ro SUCCESS labele ba-mai Dili-Ambeno. Nune’e, susar tebes ba negosiante no Ambeno-oan sira ne’ebé hela iha Dili atu hetan hahan no osan husi sira nia familia sira iha Ambeno.
António Ena nu’udar mós estudante ida iha eskola Sekundária Nicolau Lobato Tasi Tolu, husi Segunda to’o Sesta nia ba eskola, no loron Sabádu-Domingu buka osan hodi finansia nia nesesidade eskola no selu kos.
“Ha’u koos fulan ida ha’u tenke selu osan $ 25, no osan laiha atu sosa sasan hanesan foos no seluk tan,” nia hateten.
Nia hatutan, husi negosiante pentolan lubuk ida balun hela ho sira nia familia sira iha Dili laran, no balun tenke hela iha kos, tanba laiha familia.
“Ami sira be hela iha kos ne’e tenke buka osan iha semana nia rohan hodi sustenta aan molok ferik-katuas sira haruka hahan no osan mai ami, maibé agora buat hotu paradu. Ami susar loos ona”.
Tanba ne’e, nia husu no ezije ba governu sentral no mós ba Prezidente Autoridade ba Rejiaun Administrativu Oe-Kusi Ambeno (RAEOA), Arsenio Paixão Bano labele tuur nonok de’it iha Ambeno, maibé tenke buka solusaun atu oinsa bele hetan solusaun ba movimentu transporte maritima nian.
Iha fatin hanesan, negosiante pentolan Yanto Nese katak, iha semana kotuk nia tenta faan nafatin pentolan, maibé governu nia liman-ain sira hanesan parte saúde no polisia bandu total sira labele faan iha Dili laran.
“Entaun, desde semana kotuk to’o ohin loron ami lahetan osan, no ida ne’e susar tebes ba ami”.
