DILI (TOP) – Dadus husi Aosiasaun Difisiensia Timor-Leste (ADTL) katak, númeru ema ho difisiensia kada tinan aumenta hela de’it, maibé manorin-nain sira ne’ebé durante ne’e fasilita (hanorin) sira iha ema nain ha’at de’it.
Dadus ikus ba ema ho difisiente hamutuk 30.000 resin iha rai-laran, no hamutuk nain 25000 mak seidauk hetan asesu ba edukasaun.
Governu liu husi Ministériu Edukasaun mós hatene ona problema ne’e, maibé seidauk bele halo buat ida, tanba Orsamentu Jeral Estadu (OJE) ba tinan ida ne’e seidauk iha.
Faktu hatudu katak, maske governu sobu estrutura husi baze to’o nasionál, no sobu husi nasionál to'o fali baze, maibé bainhira OJE laiha, estrutura governu nian ne’e sei tuur hare malu de’it.
"Durante ne'e ita iha problema barak ba setor edukasaun nian, liliu ita nia maluk defisiente sira ne'ebé mk iha interese atu aprende, maibé ema laiha atu hanorin sira, iha parte seluk mós sira la iha fasilidadefiziku hodi fasilita sira nia atividade, husi Ministériu Edukasaun rasik mós to'o agora sidauk rezolve problema ida ne'e," hateten Ministru Edukasaun, Armindo Maia liu husi konferénsia ba imprensa iha salaun Ministériu Edukasaun, Vila-Verde, Dili Segunda 10 Agustu 2020.
Atu rezolve problema ne’e, governu liu husi ME estabelese ona kooperasaun ida ho ADTL hodi hanorin maluk difisiente sira iha rai-laran.
Iha fatin hanesan diretor ezekutivu ADTL, Cesario da Silva haktuir, ADTL mai atu apresenta preokupasaun ne'ebe durante ne'e maluk defisiente sira hasoru kona-ba edukasaun nian, ho ida ne’e mak ADTL hakarak hato'o ba Ministériu Edukasaun Joventude Desportu atu bele solusiona preokupasaun sira ne'e, tanba durante ne'e profesor nain ha’at de'it mak hanorin defisiente sira.
"Ami mai husi ADTL lori asuntu haat hodi apresenta ba Ministériu Edukasaun Joventude Desportu, asuntu dahuluk mak ema seidauk iha atu hanorin ba ita nia maluk defisiente sira liu husi jestual,” nia esplika.
“Asuntu daruak nian mak, ami husu formasaun husi professor sira atu bele fasilita ami oinsa atu hanorin ema difisiensia sira bazeia ba sira nia tipu”.
Nia hatutan, atividade ne'ebé durante ne'e ADTL halo mak esforsu aan hodi buka ema difisiensia sira iha rai laran hodi akomula hotu iha fatin ida, atu nune'e sira mós bele assesu ba iha edukasaun.
