PHNOM PENH (TOP) – LSi Business School desidi hodi atribui Doutor Honorariu iha lideransa ba Dato Sri Francisco Kalbuadi Lay atual Vise Primeiru-Ministru, Ministru Koordenador ba Ekonomia, Ministru Turizmu no Ambiente bazeia ba sira nia peskiza sientifika ne’ebé priense rekezitu sira.
LSi nu’udar institutu ensinu superior privadu ida iha Phnom Penh, Cambodia ne’ebé konsentra exklusivamente ba iha preparasaun jerasaun foun emprendedor ki’ik no médiu empreza sira. Atualmente, liu husi nia programa bacharelatu iha Administrasaun Emprezas Bachelor of Business Administration (BBA) ho materia hotu iha Inglês. Sira nia abordazen aprendizajen asenta iha pilar ha’at: koñesimentu apoiada iha esperiensia prátika, internasionalizasaun, estreita kolaborasaun ho komunidade emprezarial no kompromisiu ho umanidade.
Tuir reitor LSi Business School, Hem Bonarin hateten, LSi halo peskiza kleur ona ba estilu lideransa Dato Sri Francisco Kalbuadi Lay.
Molok atribui titulu akademiku ne’e, Vise Reitora no Dekanu Relasaun Internasional, Susan Hagadorn ne’ebé le’e sai biografia Dato Sri Francisco Kalbuadi Lay ba estudante no audiensia sira tomak katak, atual Vise Primeiru-Ministru, Ministru Koordenador ba Ekonomia, Ministru Turizmu no Ambiente Timor-Leste nian ne’e esperiensia lubuk ida ba iha lideransa.
“Tanba ne’e mak ohin ami sente kontente tebes hodi atribui titulu ne’e ba nia, no espera katak, ho atribuisaun titulu akademiku ne’e sei sai motivasaun di’ak ida foin sa’e sira iha rai-rua hodi hakat tuir,” nia esplika.
Dato Sri Francisco Kalbuadi Lay atual atual Vise Primeiru-Ministru, Ministru Koordenador ba Ekonomia, Ministru Turizmu no Ambiente simu titulu akademiku ne’e ho matan-been sulin perante estudante no audiensia sira hodi dehan, nia la merese atu hetan titulu ne’e, maibé promete katak, nia mós sei la so’e le’et de’it titulu ne’e.
“Ha’u hatete ba sira karik ha’u ne’e la merese atu simu, maibé liu husi sira nia academic research lubuk ida kompostu husi professor husi nasaun oin-oin ba ha’u hahu husi ha’u sei joven to’o ohin loron, no tuir sira ha’u merese simu ida ne’e maske todan, maibé ha’u dehan ba sira hanesan ne’e ha’u sei tane saida mak sira fó mai ha’u liu-liu iha área edukasaun oinsa mak nasaun rua bele serbisu di’ak liu-tan. No, la’os edukasaun de’it maibé, mós área seluk tan,” hateten Dato Sri Francisco Kalbuadi Lay.
Durante diskursu, nia mós la haluhan hato’o agradese uain ba nia inan ne’ebé permite nia moris iha nia kabun-laran durante fulan sia to’o moris sai boot to’o ohin loron, no mós ba nia aman ne’ebé fila uluk ona ba mundu seluk.
“Ha’u fiar ohin husi leten a’as ba nia hateke tun mai ha’u simu titulu ne’e nia sei kontente,” nia esplika.
“Prezente ne’ebé ha’u simu la’os mai ha’u de’it maibé, ofrese mós ba eroi sira ne’ebé lakon vida, ema kuaze rihun atus rua tolu nulu resin, agradese nafatin ba sira tanba, ho sira nia luta mak ohin loron ita hetan oportunidade, hanesan dadaun ha’u hamrik bele lori Timor nia naran mai simu titlu doutor honorariu husi LSi ne’ebé koñesidu tebes iha Cambodia, espera ha’u bele tane mehi ne’ebé sira fó mai ha’u liu-liu Timor-Leste nia naran ba iha futuru”.
Vise Primeiru-Ministru ne’e mós durante nia diskursu lahahula hato’o agradese uain ba Prezidente Repúblika, José Ramos-Horta, Primeiru-Ministru, Kay Rala Xanana Gusmão, nia maluk sira iha partidu CNRT nia laran tomak inklui lideransa sira hotu ne’ebé sempre hanorin Timoroan hotu atu sempre haraik aan, no tenke servi ba rai Timor-Leste nia di’ak ba oin nafatin.
Nia esplika, iha diplomasia tempu ohin loron nian kompostu husi kanal barak tebes (Track Diplomacy) ne’ebé kooperasaun bilateral entre instituisaun akademiku sira husi Cambodia ho Timor-Leste nian mós hola parte iha diplomasia.
