DILI (TOP) – Dosente Amandio de Araújo Sarmento ohin remata ona nia ezame ikus programa doutoramentu iha Universidade Udayana, Bali-Indonézia la’o ho di’ak.
Amandio de Araújo Sarmento ne’ebé durante ne’e hanorin iha Universidade Nasionál Timor-Lorosa’e (UNTL) iha Faculdade de Ciências Sociais (FCS), Departamentu Relasaun Internasional (RI) ne’e hahu kontinua nia doutoramentu iha tinan 2018, no ohin konsege finaliza ona ho susesu.
Dosente UNTL ne’e hateten, prosesu ezame ohin ne’e kompostu husi ezaminador nain-12 inklui ezaminador externa ida husi UNTL.
“Lori tinan 5 nia laran mak foin hotu. Hahu kontinua eskola ne’e iha tinan 2018,” hateten Dr. Amandio Sarmento ba The Oe-Kusi Post (TOP), Kuarta 23 Agustu 2023.
Nia kontinua estudu ne’e iha Fakultas Ekonomi dan Bisnis Universitas Udayana Bali.
“Loloos ne’e ezame tinan ida liu-ba, maibé tanba problema tekniku nian hanesan hein publikasaun ha’u nia artigu iha Journal Internasional standar Scopus, entaun ha’u tenki pasensia hein, no ohin ha’u nia artigu mós públika ona,” nia esplika.
Rezultadu ne’ebé Dr. Amandio de Araújo Sarmento hetan sei haforsa liu-tan UNTL iha FCS, liliu iha departamentu Relasaun Internasional.
