Cruz Vermella Indonézia suporta ekipamentu ba CVTL

DILI (TOP) – Cruz Vermella Indonézia suporta ekipamentu ba protesaun pessoal ba Cruz Vermella Timor-Leste (CVTL).

"Ami nia parseiru movimentu Cruz Vermella Indonézia suporta ona povo Timor-Leste liuhusi Cruz Vermella Timor-Leste dezde tinan 1970. Ami servisu hamutuk durante tinan barak ona, no mós dadaun sei kontinua suporta CVTL, maibé ohin sira apoiu tanba krize mundial ba surtu Covid-19," hateten Prezidente CVTL, Madalena Hanjam ba jornalista iha Formosa, Dili, Kinta, 04 Juñu 2020.

 

Eis Ministra Saúde ne’e hatutan, ohin loron, Cruz Vermella Indonézia halo doasaun ba ekipamentu protesaun pessoal mai CVTL atu nune'e bele distribui ba CVTL nian voluntariu no membru sira iha munisipiu 12, inklui RAEOA atu suporta sira nia servisu, halo sensibilizasaun ba komunidade sira hotu, oinsa mak atu prevene no bele hela iha fatin seguru durante surtu Covid-19.

"Ami hato'o bemvindu ba Sahat sitorus, embaixador Repúblika Indonézia ba Timor-Leste ne’ebé agora entrega ekipamentu mai CVTL, dala ida tan ami agradese tebes ho asistensia ne’e.”

Hanjam dehan, CVTL servisu maka’as tebes iha teritóriu Timor-Leste hodi kontinua desinima no habelar informasaun ba komunidade sira iha área rural relasiona ho surtu Covid-19. No, mós moras dengue agora sa’e maka’as iha rai laran.

Ekipamentu sira hanesan máskara respiratoriu nian hamutuk 500, ropa protetivu 500, oklu 500, protesaun ba rostu 500, dezinfekta 10,000, sprayer 10 pcs, no thermometru 10 pcs.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE