Fundasaun Xanana apoiu kareta ida ba Centro Miguel Magone

DILI (TOP) – Tersa feira ne’e, Eis Lider Rezistensia, Kay Rala Xanana Gusmão liu hosi Fundasaun Xanana Gusmão fó apoiu mikrolete ida ba Centro Miguel Magone iha Balide, Dili.

Maske la hola parte iha estrutura governu atual, Xanana kontinua assume responsabilidade morál nu’udar lider nasionál hodi la tuur nonok bainhira rona lia-halerik husi ninia sidadaun sira.

Foin lalais ne’e, bainhira partisipa natál hamutuk ho seminarista sira iha Seminario Minor Balide Dili, teki-teki labarik lubun ne’ebé hamahan aan iha Centro Miguel Magone ne’ebé hetan informasaun kona-ba perezensa Xanana nian la husik leet, nune’e hakbesik kedas hodi aprezenta problema ne’ebé sira infrenta durante ne'e.

Ba Xanana Gusmão, ho sentimentu triste kahur kontenti, vitima bazeia ba generu hirak ne’e relata, aliende infrenta problema psikologia nomos domin husi familia, sira mós enfrenta problema ligadu ho kondisaun hela fatin inklui seluk tan.

Rona preokupasaun ne’e, Xanana Gusmão foti kedas asaun liu husi apoiu nesesidades hirak ne’ebé uma mahon refere infrenta. Aliende aihan, toba fatin no seluk tan, liu husi nia fundasaun Xanana Gusmão apoiu mós transporte (Microlete ida) ne’ebé hakerek naran, Centro Miguel Magone (Fundação Xanana Gusmão) hodi fasilita deslokasaun labarik sira nian.

“Ha’u agradese tebes ba funsionariu sira husi uma mahon Centro Magone tanba sira ba dada ha’u iha seminariu minor iha loron, 27 Dezembru 2020, atu mai haree rasik ho matan kondisaun labarik sira iha ne’e. Ha’u apresia no elojia tebes dedikasaun sira hotu iha ne’e hodi tau matan ba labarik sira ne’ebé presiza tebes tulun no atensaun,”haktuir Xanana iha mensagen doasaun karreta ne’ebé transmite liu husi Presidente Executivo Centro.

Eis Xefe Executivu iha esperansa katak, ho doasaun transporte husi fundasaun Xanana Gusmão sei tulun deslokasaun labarik sira nian ba eskola no mós fatin seluk.

“Ha’u iha esperansa katak, transporte ida ne’e sei tulun deslokasaun labarik sira nian aliende ba eskola no mós fatin seluk,” nia espera.

Lider nasionál ne’e dejafia funsionáriu iha Uma Mahon Centro Magone atu nafatin dedika aan hodi proteze direitu labarik ne’ebé konsagra ona tuir lei Direitu Labarik nian.

“Ha’u husu ba imi hotu iha uma mahon ne’e atu dedika aan nafatin hodi proteze labarik sira tuir direitu fundamentál ne’ebé imi defende. Ha’u husu ba Maromak fó tinan foun 2021, ne’ebé kmanek tebes ba ita hotu,” tenik Xanana ho esperansa.

Iha fatin hanesan, Diretór Centro Magone, Damião da Silva konsidera, apoiu refere importante tebes tanba ne’e sei asegura ho responsabilidade nune’e bele fasilita labarik sira.

“Apoiu ne’ebé fó husi Maun Boot Xanana Gusmão liu-liu doasaun transporte mikrolet ida ne’e importante tebes atu tulun desloklasaun labarik sira nian. Tanba ne’e, promete sei utiliza ho responsabilidade hodi fasilita labarik sira,”deklara responsavel Centro.

Fundasaun ne’e rasik eziste iha tinan 1997, no hahú funsiona iha tinan 2000 ate agora. Dadaun ne’e akomula labarik hamutuk 79 kompostu husi mane 12, feto 67, mai husi munisipiu sanulu resin rua inklui RAEOA.

Aliende fó protesaun ba labarik, fundasaun ne’e mós halo akonsiliasaun ba labarik sira ne’ebé sai vitima ba kazu violensia ba jeneiru liu husi rekoperasaun ba mentalidade inklui fasilita formasaun formál no naum formál ba hirak ne’ebé hamahan aan iha Fundasaun ne’e rasik. 

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE