DILI (TOP) – Vise xefe bankada partidu Konsellu Nasionál Rekonstrusaun Timorense (CNRT), Patrocino Fernandes hateten, CNRT sei la partisipa ba seremónia harii hikas meza Parlamentu Nasionál (PN) foun ne’ebé deputadu sira halo rahun tiha iha loron 19 Maiu liuba.
"Bankada CNRT nia pozisaun sei la partisipa iha prosesu ida ne'e," hateten deputadu Patrocino ba jornalista sira iha Parlamentu Nasionál, Dili, Tersa 01 Setembru 2020.
Rajaun CNRT sei la partisipa iha serimónia ne’e, tanba tuir CNRT ne’e ne’e la’os problema baibain, maibé problema konstituisaun nian.
"Meza Parlamentu Nasionál ne'e, baku fila, tanba ema tenta atu hetan poder ne'ebé la liu husi dalan konstitusaun ninian, la liu husi dalan legal sira ne'ebé mak vigóra iha ita nia rai, ho ida ne'e mak akontese meza Parlamentu Nasionál ne'e baku fila. Ita la rezolve problema ne'e ho hamulak, ita la rezolve problema ne'e ho harii fila-fali meza Parlamentu foun, ne'ebé ita atu harii fali meza Parlamentu ne'e nia fukun loloos mak violasaun konstitusaun," nia fundamenta.
Nia hatutan, Parlamentu Nasionál ne'e, fatin atu halo lei, ba aban bainrua ema hotu-hotu bele halo tuir lalaok estadu nian ne'e tuir lei ne'ebé mak iha.
“Ohin loron ita sama tiha lei ba rai depois ita atu hanoin katak tau kreadibilidade Parlamentu Nasional".
Tuir planu, Prezidente Parlamentu Nasionál Aniceto Guteres sei hadia hikas meza Parlamentu Nasionál iha Sesta 04 setembru 2020.
